मेलम्ची स्वन्ति लिपा

येँ – स्वनिगलय् स्वन्ति लिपा जक मेलम्चीया लः वइगु जूगु दु । मेलम्ची खानेपानी आयोजनाया प्रमुख सूर्यराज कँडेलं आः वइगु निलाया दुने मेलम्चीया लः वइगु खँ कनादीगु खः । कँडेलया कथं थ्यंमथ्यं २५,८०० मिटर मध्ये १५,३८७ मिटर सुरुङ दयेकेगु ज्या क्वचायेधुंकूगु दु । उकी मध्ये १०,५३३ मिटर दयेकेगु लिपांगु चरणया ज्या जुयाच्वंगु दुसा थ्व सुइन्हु निसें पीन्हुया दुने क्वचाइगु खँ दु ।

मेलम्चीया लः हयाः उकियात निर्मलीकरण यायेगु निंतिं ८ करोड ५० लाख लिटर लः न्ह्यनीगु ट्यांकी दयेकाच्वंगु दु । मेलम्चीया लः सुन्दरीजल हयाः अनं थीथी थासय् वितरण याइ । मेलम्चीया लः हयेगु बारे अध्ययन यायेत राष्ट्रियसभाया राष्ट्रिय सरोकार तथा समन्वय समितिया दुजःपिं आइतवाः मेलम्ची वनेगु तयारी जुयाच्वंगु दु ।

थ्वहे वइगु मोहनि न्ह्यः हे मेलम्चीया लः स्वनिगलय् हयेगु लागिं कुतः जुयाच्वंगु खःसां इलय् ज्या मजूगु कारणं थ्व ज्या जुइ मफुगु खः । आः लिबाक जूसा मेगु स्वन्ति लिपा लः हये फइगु खँ परियोजनां धाःगु दु ।

सम्बन्धित बुखँ

LEAVE YOUR COMMENTS