जी टिभीं यानाः प्रमयात आपत
ओलीं सःतूम्ह भारतीय पत्रकारपाखें नेपाःयात हानं आक्रमण
येँ (नेपालभाषा टाइम्स) – भारतीय सञ्चार माध्यम ‘जी टिभी’ या छम्ह पत्रकारं यानाः प्रधानमन्त्री केपी ओली व वय्कःया टीम विवादय् लाःगु दु। छगू इलय् प्रम ओली लगायत नेपाःया बारे अतिकं अमर्यादित सामग्री प्रशारण यानाः विवादय् लाःगु जी टिभीया सम्पादक लिसें कार्यक्रम सञ्चालक सुधीर चौधरीयात थुगुसी प्रधानमन्त्रीं हे नेपालय् सःताः ‘विशेष अन्तर्वार्ता’ बिल धकाः आलोचना जुयाच्वंगु हे इलय् उम्ह पत्रकारं सगरमाथाया बेस क्याम्पय् वनाः सगरमाथायात भारतं समेत दावी यासें भारतीय नां बीमाः धकाः अभियान शुरु याना बिल । पत्रकार चौधरीया थ्व ज्यां यानाः प्रधानमन्त्री ओली थप आलोचित जुयादीगु दु ।
सगरमाथायात भारतीय नां बियाः ‘माउन्ट सिकदर’ धायेमाः धइगु जी टिभीं शुरु याःगु अभियानयात कयाः धाःसा आः तक प्रधानमन्त्रीया सचिवालय वा वय्कःया प्रेस सल्लाहकारपिंपाखें छुं कथंया टिप्पणी तकं याःगु मदुनि। सगरमाथायात भारतीय नां बीमाः धइगु अभियान शुरु यायेगु लागिं पत्रकार चौधरी अनुमति हे मकासे हेलिकप्टर चार्टर यानाः सगरमाथाया बेस क्याम्प वंगु खँ नं पिहां वःगु दु, गुगु मूलतः गैरकानुनी ज्या खः । वय्कःयात औपचारिक अनुमति हे मकासे बेसक्याम्प वनेगु अनुमति नं प्रधानमन्त्री कार्यालयं उपलब्ध याकूगु द्वपं समेत वःगु दु ।
नेपाः व नेपाःया प्रधानमन्त्रीयात बदनाम यायेगु लागिं अमर्यादित ज्या याःगु सञ्चार माध्यमयात ‘दण्ड’ कथं नेपाः सरकारं नापलायेगु ज्या तकं मयाये माःथाय् अःखतं प्रधानमन्त्री थम्हं हे सःताः ‘मेहमानबाजी’ याःगु कारणं नेपाःया मिडिया आक्रोशित जुयाच्वंगु दु। जीटिभीया पत्रकार चौधरीं काःगु अन्तर्वार्ताय् नं समसामयिक खँ स्वयां नं अप्वः प्रधानमन्त्रीयात ‘राष्ट्रवादी’ धकाः ब्वयेगु सुनियोजित कुतः जूगु टिप्पणी समेत राजनीतिक ख्यलय् जुयाच्वंगु दु ।
प्रम ओलीं भारतया हे इशाराय् संसद भंग यायेगु ज्या याःगु धइगु विश्लेषण जुयाच्वंगु कारणं उकियात खण्डन याये कथं थुकथंया सुनियोजित अन्तर्वार्ता बीगु ज्या जूगु अनुमान थन जुयाच्वंगु दु। जीटिभीं थःगु प्रचलित शैली स्वयां अलग्ग जुयाः अन्तर्वार्ता काःगुलिं नं थज्याःगु अनुमान जुयाच्वंगु खः ।
LEAVE YOUR COMMENTS