रवियात सफाइ बिउगु विरुद्ध मुद्दा दर्ता
येँ (नेपालभाषा टाइम्स)÷ राष्ट्रिय स्वतन्त्र पार्टीया सभापति रवि लामिछानेयात राहदानी विवादय् मुद्दा चले मयायेगु महान्यायाधिवक्ताया निर्णय विरुद्ध सर्वोच्च अदालतय् रिट दायर जूगु दु । नागरिकता विवादय् लामिछाने विरुद्ध मुद्दा तःम्ह युवराज सफलं हे म्हिगः महान्यायाधिवक्ताया निर्णय विरुद्ध सर्वोच्च अदालतय् रिट बिउगु खः ।
सर्वोच्च अदालतया प्रवक्ता विमल पौडेलं रिट दायर जूगु खँ स्वीकार यासें दर्ता यायेगु वा मयायेगु धइगु बारे अध्ययन जुयाच्वंगु खँ धयादीगु दु । वंगु चैत ६ गते महान्यायाधिवक्ता दिनमणि पोखरेलं लामिछाने विरुद्ध राहदानी दुरुपयोगय् मुद्दा चले मयायेगु निर्णय याःगु खः । व स्वयां न्ह्यः जिल्ला सरकारी वकिलया कार्यालय येँ व उच्च सरकारी वकिलया कार्यालय यलं लामिछाने विरुद्ध मुद्दा चले यायेगु आवश्यकता मदुगु प्रतिवेदन महान्यायाधिवक्ताया कार्यालयय् बुझे याःगु खः ।
प्रधानमन्त्री पुष्पकमल दाहालं विश्वासया मत काइगु न्हि कुन्हु महान्यायाधिवक्ता पोखरेलं लामिछानेयात लाःगु मुद्दा मन्ह्याकेगु निर्णय याःगु खः । अमेरिकी राहदानी दयेक दयेकं लामिछानें नेपाःया राहदानी काःगु धासें लामिछानेया बारे अनुसन्धान यानाः मुद्दा न्ह्याकेमाः धकाः गृह मन्त्रालयय् उजुरी लाःगु खः ।
LEAVE YOUR COMMENTS