सुकुम्बासी मचीकेत अन्तरिम आदेश
येँ (नेपालभाषा टाइम्स)- येँ महानगरपालिकां सार्वजनिक जग्गा मिचे यानाः दयेकातःगु अनधिकृत संरचना न्हय्न्हुया दुने चीकेत बिउगु सुचंयात तत्काल कार्यान्वयन मयायेत उच्च अदालत यलं अल्पकालीन अन्तरिम आदेश बिउगु दु ।
न्यायाधीश धीरबहादुर चन्दया एकल इजलासं म्हिगः दर्ता जूगु रिट निवेदनय् सुनुवाइ यासें न्हय्न्हुया दुने मचीकल धाःसा महानगर थम्हं संरचना चीकेगु जुइ धकाः जारी याःगु सुचं हालयात कार्यान्वयन मयायेत आदेश बिउगु खः । थुगु आदेशयात निरन्तरता बीगु÷मबीगु बारे सहलह यायेत अदालतं निगुलिं पक्षयात चैत २६ गते उपस्थित जुइत निर्देशन बिउगु दु ।
महानगरया सुचंपाखें प्रभावित जूपिं वस्तीया जानुका पाख्रेल, शुभमाया परियार (कपाली), सानु तामाङ, पवित्रा नेपाली, झवरलाल उराव व नेपाल महिला एकता समाजं मंकाः रुपं वंगु चैत १६ गते उच्च अदालत यलय् रिट दर्ता याःगु खः । रिट निवेदनय् येँ महानगरपालिका, राष्ट्रिय भूमि आयोग, अधिकार सम्पन्न बागमति सभ्यता एकीकृत विकास समिति, प्रधानमन्त्री तथा मन्त्रिपरिषदया कार्यालय, राष्ट्रिय मानव अधिकार आयोग लगायतयात विपक्षी दयेका तःगु दु ।
येँ महानगरपालिकां वंगु चैत ११ गते खुसि सिथय् च्वंगु व खुसि करिडोरया सार्वजनिक क्षेत्रय् अनधिकृत रुपं दयेकातःगु संरचना चीकि धासें सुचं पिथंगु खः । संरचना चीकेत येँमनपां छवाःया ई बिउगु खः ।
LEAVE YOUR COMMENTS