ने. सं. ११४४ ञलाथ्व नवमी -

ट्रकं स्कुटरय् ठक्कर नकाः मनू सीवं गट्ठाघरय् तनाव

येँ (नेपालभाषा टाइम्स)- ट्राफिक चेकिङया इलय् छगः ट्रकं ठक्कर नकाः स्कुटर गयावःम्ह छम्ह मिजंया ज्यान वनेवं म्हिगः गट्ठाघरय् ब्यापक तोडफोड व ट्राफिक प्रहरी विरुद्ध प्रदर्शन जूगु दु । येँनं ख्वपपाखे वनाच्वंगु बा. ४९ प ८९४४ नम्बरया स्कुटरयात वहे लँपुं वनाच्वंगु ना. ख २१७३ नम्बरया ट्रकं ठक्कर नकाः नचुक हे क्यःगु खः । सीम्ह मिजं अन्दाजी ४०-४५ दँयाम्ह उत्तम काेइराला जूगु खँ धाःगु दु । थ्वयां न्ह्यः सीम्ह मिसाम्ह जूगु व उम्ह मिसा दाेलखा सुष्मा नेपाली जूगु धकाः वयाच्वंगु खः । प्रहरीं उगु स्कुटर उत्तम काेइरालाया नामय् हे दुगु व अन लूगु लाइसेन्सय् नं उत्तम काेइराला हे च्वयातःगु धाःगु खः । दुर्घटनाय् लाःम्ह मनूयात ट्रकं लुयायंकाः ख्वाः हे सीमदुगुलिं मिजं कि मिसा धकाः हे सीमदयाच्वंगु खः ।

गुगु थासय् थ्व दुर्घटना जूगु खः अन हे लाक्क ट्राफिक प्रहरीं चेकिङ यानाच्वंगु जुयाच्वन । चेकिङं यानाः अन मोटरसाइकलत ग्वाःग्वाः दिकातःगु खः । ट्राफिक चेकिङ खनाः स्कुटर चालकं आकाझाकां थःगु स्कुटर दिकेगु कुतः यायेवं लिउनें ब्वाका हःगु ट्रकं वयात ठक्कर नकूगु खः । गुलिसिनं ट्रकं लुया यंकेधुंकाः लिपा हानं ब्याक यानाः क्ययेकूगु धकाः नं धाःगु दु ।

घटना जूगु इलय् नापसं हे दुम्ह छम्ह प्रत्यक्षदर्शीं धाःकथं ट्रकं मनूयात क्यलेधुंकाः नं ट्राफिकत धाःसा अन मस्वसे चेकिङय् हे व्यस्त जुयाच्वंगु खः । लिपा जःखः च्वंपिं स्थानीय मनूत ब्वाँय् वयेवं तिनि ट्राफिकत ट्रकपाखे वंगु खः । अबले तकया दुने ट्रक चालक गाडी त्वःताः बिसिउँ वनेधुंकल ।

वयां लिपा आक्रोशित जूपिं मनूतय्सं ट्रकय् अप्पां कयेकाः क्षति याना बिउगु खः । लिसें उमिसं अन च्वंगु ट्राफिक आइल्याण्ड तकं स्यंकाः मि तया बिउगु खः । स्थिति ग्यानापुसे च्वनेवं अन नापसं च्वंगु चौकीं पिहां वःपिं सलंसःम्ह प्रहरीतय्सं कयौं राउण्ड टियर ग्याँस कयेकूगु खः । प्रहरीं टियर ग्याँस कयेकेवं लँय् वयाच्वंपिं मनूत समेत जःखः च्वंगु गल्लिपाखे बिसिउँ वंगु खः । उगु इलय् अन छझाः प्रहरीलिसे अप्पां कयेकाः ल्वापु नं जूगु खः ।

घटनास्थलय् थ्यंपिं मनूतय्सं अनया दृश्ययात बंगलादेशय् नकतिनि जूगु तःधंगु प्रदर्शनलिसे तुलना यानाः स्वःगु दु । ल्वापु जुयाच्वंगु हे इलय् प्रहरीं दुर्घटनाय् लाःम्हेसित ल्ह्वनाः पोष्ट मार्टमया लागिं टिचिङ अस्पताल यंकूगु खःसा अबले नं उत्तेजना ब्वलंगु खः ।

प्रहरी व स्थानीय दथुइ ल्वापु जुइवं उगु लँ हे ताउत तक बन्द जूगु खःसा सवारी साधनयात मेगु लँपु जुयाः छ्वयेगु ज्या जूगु खः । प्रहरीं ट्रकया चालकयात मालाच्वंगु दुसा प्रदर्शनय् कुहां वःपिं मनूतय्सं अन लँ पंक चेकिङ यानाच्वंपिं ट्राफिकतय्त नं कारवाही यायेमाः धकाः माग याःगु दु ।