देय् दबू येँया न्हापांगु साधारणसभा

येँ(नेपालभाषा टाइम्स)- नेवाः देय् दबू येँ जिल्ला समितिया न्हापांगु दँमुँज्या वंगु शनिवाः थनया जगतसुन्दर ब्वनेकुथिइ जुल । दबूया येँ जिल्ला समितिया नायः धनबहादुर तिमिलाया सभापतित्वय् जूगु दँमुँज्याया उलेज्या मूपाहांकथं झायादीम्ह देय् दबूया केन्द्रीय नायः पवित्र वज्राचार्यं यानादीगु खः ।

ज्याझ्वलय् नवासें देय् दबूया केन्द्रीय नायः वज्राचार्यं स्वनिगःया आदिवासी झी नेवाःत स्वनिगः थेंज्याःगु झीगु थःगु थासय् राष्ट्रिय संगठनया छेँ मदयेकाः च्वँच्वनेमाःगु तसकं दुःखया खँ खः धासें देय् दबूया थःगु हे धस्वाकेत सकसिनं थःथःगु थासं ग्वाहालि यायेत इनाप यानादिल ।

वय्कलं देय् दबूया थःगु छेँ छखा थुगु हे कार्यकालय् धस्वाकेगु प्रतिवद्धता प्वंकादिसें थःगु हे छेँ मदुगुलिं आपालं नेवाःतय्सं आतक नं देय् दबूया बारे बांलाक थुइकेगु व जानकारी काये मफयाच्वंगु खः धयादिल ।

स्वनिगलय् च्वँच्वनापिं झी नेवाःत थवंथवय् थीथी कारणं मिले जुयाः वा छप्पँ जुयाः च्वनेत थाकुसां गुथि विधेयक विरुद्धया आन्दोलनय् सकलें नेवाःत सतकय् कुहां वःगुलिं स्वनिगः पिने च्वंपिं नेवाःतय्त छप्पँ जुइगु ह्वःताः चूलाका बिउगु खँय् लसता प्वंकादिसें थ्व एकताया ल्यंका तयेमाः धयादिल ।

येँ जिल्लाया छ्याञ्जे धनवीर महर्जनं वार्षिक प्रगति व दांभरिं धर्मराज शाक्यं आर्थिक प्रतिवेदन न्ह्यब्वयादीगु ज्याझ्वलय् राजभाई जकःमिं चिनाखँ ब्वनाः न्यंकादीगु खः । अथे हे उगु ज्याझ्वलय् इमेज टेलिभिजनय् प्रशारण जुया वयाच्वंगु लोकंह्वाःगु ‘ख्वताबजि’ पुचःयात विशेष सम्मान नं याःगु खः ।