जनगणनाया निंतिं कर्मचारी भर्ना अनलाइनपाखें

येँ- केन्द्रीय तथ्यांक विभागं राष्ट्रिय जनगणना–२०७८या निंतिं तथ्यांक संकलन याइपिं गणक व सुपरीवेक्षकया भर्ना कायेगु शुरु याःगु दु । विभागं गणक व सुपरीवेक्षकया निंतिं अनलाइन प्रणालीपाखें आवेदन कायेगु शुरु याःगु खः ।

विभागं आइतवाः छगू पत्रकार सम्मेलन यासें राष्ट्रिय जनगणना २०७८या निंतिं करारय् गणक व सुपरीवेक्षक पदया निंतिं अनलाइनपाखें दरखास्त आह्वान याःगु खः । पत्रकार सम्मेलनय् बिउगु जानकारीकथं जनगणनाया निंतिं करिब स्वीगुद्वः गणक व च्याद्वः सुपरीवेक्षक आवश्यक जुइगु नं विभागं जानकारी बिउगु दु । गणक व सुपरीवेक्षकय् स्थानीय व्यक्तियात हे महत्व बीकथं राष्ट्रिय जनगणना संचालन निर्देशिका २०७७ कथं अनलाइन प्रणालीपाखें आवेदन कयाः भर्ना यायेगु विभागं न्ह्यथंगु दु । विभागया महानिर्देशक नेविनलाल श्रेष्ठं आवेदन बीत न्हिछितक हुलमुल जुइक झ्वःछुनाः च्वनेमालीगु जूगुलिं अनलाइनपाखें आवेदन कायेगु व्यवस्था यानागु जानकारी बियादिल ।

जनगणनाया निंतिं गणक व सुपरीवेक्षक यानाः झण्डै न्यय्निद्वः जनशक्ति आवश्यक जुइगु व अप्वः थें करारय् हे नियुक्त यायेगु जुइ धासें वय्कलं मगाःगु जनशक्ति स्थानीय सार्वजनिक विद्यालयया शिक्षक व सरकारी कर्मचारीपाखें पूर्ति यायेगु जुइ धयादिल ।

गणक व सुपरीवेक्षकया निंतिं ख्वीन्हुया दुने अनलाइनपाखें आवेदन बी फइगु व छुट जूपिनिगु निंतिं चैतय् प्रदेश व जिल्लाय् जनगणना ज्याकू चायेकेधुंकाः छवाःया दुने आवदेन बी फइगु नं जानकारी बिउगु दु । निगुलिं पदया निंतिं स्नातक वा सो सरहया शैक्षिक योग्यता दयेमाःगु विभागं स्पष्ट याःगु दु । थुगुसी थ्व स्वयां न्ह्यःया जनगणनाय् स्वयां च्यागू आधारभूत न्ह्यसः थप याःगु दुसा जनगणना वइगु २०७८ जेठनिसें असारतक संचालन जुइ ।

सम्बन्धित बुखँ

LEAVE YOUR COMMENTS