खास्ती चैत्यय् लुँ घोटाला !

चैत्य पुनर्निर्माणय् १६ किलो गायब जूगु आशंका

येँ – वंगु वि.सं. २०७२ वैशाख १२ गते ब्वःगु तःभुखाचं क्षति याःगु खास्ती चैत्य (बौद्ध) दयेकेगु झ्वलय् १६ किलो लुँ दथुइ हे तंगु खँ सीदुगु दु ।

खास्ती चैत्य दयेकेगु झ्वलय् ३१ किलो लुँ खर्च जूगु ल्याःचाः क्यनेवं महालेखा परीक्षकया ज्याकुथिं पुरातत्व विभागया नियम स्वयां १६ किलो लुँ अप्वः छ्यःगु धासें लुँइ घोटाला जूगु विश्लेषण न्ह्यःने तयाः थुकिया बारे छानबिन यायेगु लागिं सरकारयात निर्देशन समेत बिउगु दु ।

विभागया नियम कथं दर विश्लेषण यायेबलय् प्रति वर्गफिट प्यब्वय् छब्व (१/४) तोला लुँ जुइमाःगु खः । थ्व ल्याखं १६ हजार ४५८.६४ या दरं ८ करोड २२ लाख ९२ हजार तकाया १४ किलो ५८० ग्राम जक लुँ खपत जुइमाःगु खःसां ३१ किलो लुँ खपत जुल धकाः क्यनातःगु खँ महालेखां धाःगु दु । अप्वः खपत जूगु १६ किलो ४२० ग्राम लुँया मू ८ करोड ८८ लाख ८ हजार तका जूगु खँ पाय्छि मजू धासें थुकियात कयाः छानविन यायेत महालेखां सरकारयात सुझाव बिउगु खः ।

समितिं स्वीकृत याःगु लागत अनुमानय् लुँ छ्यलेगु सम्बन्धय् आधार खुले यानातःगु खने मदुगु खँ महालेखा प्रतिवेदनय् न्ह्यथनातःगु दु । कार्य सम्पन्न प्रतिवेदनय् लुँ छ्यलेगु सम्बन्धी काई ४ हजार ९९९ वर्ग फिटय् ३३ हजार ५३३ दरं ३१ किलो लुँ छ्यलागु धकाः १६ करोड ७६ लाख ६५ लाख खर्च जूगु खँ न्ह्यथनातःगु दु ।

खास्ती चैत्य पुनर्निर्माण यायेत १२ करोड ४६ लाख तकाया खर्च स्वीकृत जुयाच्वंगु दुसा समितिया निम्ह दुजः व छम्ह कर्मचारीपाखें अमानतं ज्या याकाः २१ करोड ९८ लाख ४८ हजार तका खर्च क्यनातःगु दु ।

अथेहे चैत्य दयेकेगु निंतिं थीथी व्यक्तिंपिंसं दान याःगु लुँया विवरण मदुगु खँ नं धाःगु दु । हर्मिका, त्रयोदश भूवन, गजू आदि दयेकेगु निंतिं चीनया छगू संस्थां खर्च याःगु खःसा उकिया नं अभिलेख मदुगुलिं उकी घोटाला जूगु अनुमान याःगु दु ।

लिसें मेम्ह छम्ह दातां बिउगु ४८ तोला ८९ लाल लुँ नं उगु ३१ तोला लुँइ तुं खर्च जूगु धकाः क्यनातःगु दु । थथे थीथी दातापिंसं बिउगु लुँया अभिलेख मदुगुलिं खर्चया परिमाण क्वःछी मफुगु खँ नं महालेखां धाःगु दु ।