गुह्येश्वरी बिस्कं ज्याकू

येँ (नेपालभाषा टाइम्स)- पशुपति क्षेत्र विकास कोषं गुह्येश्वरीइ बिस्कं ज्याकू थापना यानाः उगु क्षेत्रयात अझ व्यवस्थित याइगु जूगु दु । कोषया स्थापना कालंनिसें गुह्येश्वरी देगः क्षेत्र नं पशुपतिया प्यंगू किल्ला दुने लाःगु व्यवस्था ऐनय् यानातःगु दु । देगः क्षेत्रयात थप व्यवस्थित यायेत गुह्येश्वरीइ बिस्कं ज्याकू चायेकूगु खँ कोषण प्रवक्ता रवतीरमण अधिकारीं कनादीगु दु ।

विश्व सम्पदा सूचीइ सूचीकृत थुगु क्षेत्रयात थप व्यवस्थित यायेफत धाःसा थन आन्तरिक व बाह्य पर्यटकतय् भ्रमण अप्वयेके फइगु विश्वास कोषं काःगु दु । कोषं विसं २०६८ स पशुपतिया देगलय् छाइगु भेटी पारदर्शी यायेत नियमावली जारी याःगु खः ।

नियमावली कथं पशुपति क्षेत्रया मू देगःया रुपय् दुगु पशुपतिनाथया भेटी पारदर्शी जूसां नं गुह्येश्वर, विश्वरुप, चन्द्रविनायक लगायत महत्वपूर्ण देगलय् छाये हइगु ध्यबा व्यवस्थित यायेत अझ नं नियमावली दयेके फयाच्वंगु मदु ।

गुह्येश्वरीइ बिस्कं ज्याकू चायेकेधुंकाः नियमावली दयेकाः थन छाय् हइगु ध्यबा नं पारदर्शी यायेगु ज्यायात प्राथमिकता बीगु खँ प्रवक्ता अधिकारींकनादिल ।