साझां थप नीगः न्हूगु सिटी बस हइगु

येँ- साझा यातायातं हाकनं मेगु नीगः सिटी बस हइगु जूगु दु । साझां उगु बस भारतं झिके यायेत्यंगु खः । छुं ई न्ह्यः साझां बस न्यायेत याःगु ठेक्का सम्झौताकथं हे उगु न्हूगु सिटी बस हयेगु तयारी याःगु खः । साझां न्हूगु सिटी बस येँ महानगरपालिका व यल महानगरपालिकां न्याःगु सेयरपाखें प्राप्त ध्यबां हयेत्यंगु खः । येँ महानगरपालिका व यल महानगरपालिकां संस्थाया सेयर न्याःगु वापत प्राप्त ध्यबापाखें हे न्हूगु बस न्यानागु साझाया प्रबन्धक महेन्द्रराज पाण्डेयं कनादिल ।

येँ मनपां न्यागू करोड व यल मनपां छगू करोडया शेयर न्याःगु खःसा उगु हे ध्यबां साझां न्हूगु बस न्यायेगु निंतिं खरिद प्रक्रिया न्ह्याकूगु खः । न्हूगु बस येँय् थ्यनेवं स्वनिगलय् आवश्यक व माग जूगु थाय् स्वयां सरकारयाके रुट माग यानाः संचालनय् हयेगु जानकारी वय्कलं बियादिल ।

वि.सं. २०१९ य् साझा यातायातं थःगु बस सेवा शुरु याःगु खः । छगू इलय् साझाया सेवा अतिकं लोकप्रिय जूगु खः । तर लिपा थीथी समस्याया कारणं करिब निगू दशकं मल्याक साझाया सेवा ठप्प जूवंगु खः ।

छगू इलय् साझां स्वनिगलं पिनेतकं थःगु सेवा बिया वयाच्वंगु खः । करिब निगू दशक लिपा २०७० सालया शुरुनिसें साझां न्हूगु बस न्यानाः हाकनं सेवा संचालनय् हःगु खः । न्हापा स्वनिगःया सहरी लागाय जक सेवा बिया वयाच्वंगु साझां आः ग्रामिण लागाय् नं सेवा बिया वयाच्वंगु दु ।