पत्रकार दबूयात ताम्रकार समाजया भिंतुना

यल (नेपालभाषा टाइम्स)- ताम्रकार समाजं नेवाः पत्रकार राष्ट्रिय दबूया नवनिर्वाचित न्हूगु ज्यासना पुचःयात लसकुस यासें भिंतुना देछाःगु दु । समाजया थःगु हे भवन जावलाख्यःस्थित तमकः द्यःयाथाय् उगु ज्याझ्वः जूगु खः ।

समाजया नायः विनोद ताम्रकारं भाषा, कला, संस्कृति, सम्पदा व मौलिक परम्परा ल्यंकेगु ज्याय् राज्यसत्ताया गलत सोच व प्रवृत्ति हावि जुया वनाच्वंगु नापं सरोकारवालायात बेवास्ता याना वनेगु राज्यसत्ताया सोचया कारणं अनेकथंया समस्या फयेमालाच्वंगु अवस्थाय् संचारमाध्यमया भूमिका महत्वपूर्ण जूगु विचाः तयादिल ।

वय्कलं सतक विस्तारया नामय् तमकःद्यःयाथाय् अतिक्रमण याके मबीत समाजं याःगु विरोध, भुखाय् लिपा देगःया पुनःनिर्माण, ग्यास मुयाः मदुपिं समाजया जःपिनिगु निंतिं क्षतिपूर्ति कायेगु निसें समाजं याना वयाच्वंगु हरेक ज्याखँय् संचारमाध्यया भूमिका सहयोगी जूगु धयादिल ।

समाजया निवर्तमान नायः रविन्द्रराज ताम्रकारं समाजया उद्देश्य प्राप्तिया लँपुइ संचारमाध्यमं बियाच्वंगु योगदानयात कयाः च्वछायादिल
दबूया नायः नृपेन्द्रलाल श्रेष्ठं समाजं संचारमाध्यमलिसे सहकार्य याना वनेगु बारे मेमेगु जातीय समाजं नं सयेका कायेमाः धयादिल । ज्याझ्वलय् दबूया वरिष्ठ उपाध्यक्ष सुनिल महर्जनं समाजया उपाध्यक्ष शम्भुगोविन्द ताम्रकार, सचिव दिपेश ताम्रकार, दबूया यल जिल्लाया नायः मञ्जु वज्राचार्य लगायतं नं नुगःखँ तयादीगु खः ।