सर्वेन्द्र खनाल प्रहरी महानिरीक्षक
येँ – सरकारं प्रहरी महानिरीक्षकय् सर्वेन्द्र खनालयात नियुक्त याःगु दु । थौं सनिलय् च्वंगु मन्त्रिपरिषद्या बैठकं डिआइजी खनालयात आइजीपी नियुक्त याःगु खः । अथेहे सशस्त्र प्रहरी महानिरीक्षक शैलेन्द्र खनालयात नियुक्त याःगु दु ।
प्रहरी महानिरीक्षकया निंतिं खनालया लिसें रमेश खरेल व पुष्कर कार्कीया नां वयाच्वंगु खः । अथेहे सशस्त्रया महानिरीक्षक दौडय् पुष्पराम केसी दुगु खः ।
प्रधानमन्त्री केपी ओलीं गृहमन्त्री रामबहादुर थापा व माओवादी अध्यक्ष पुष्पकमल दाहाल लिसे सल्हा लिपा खनालद्वययात महानिरीक्षकय् नियुक्त याःगु खः ।
प्रहरी महानिरीक्षक जुयादीम्ह खनाल एआइजी पदं डिआइजीइ बढुवा जूबलय् खरेल व कार्की स्वयां कार्यसम्पादन मूल्यांकनय् अप्वः नम्बर कयाः बढुवा जुयादीम्ह खः । डिआइजीइ बढुवा जूगु च्याला लिपा हे खनाल आइजीपी जुइत ताःलाःगु खः । डिआइजीइ बढुवा जूगु च्याला तिनि दुगुलिं न्हूगु कार्यसम्पादन मूल्यांकन धाःसा मजूसा हे आइजीपी बढुवा याःगु खः ।
प्रहरी महानिरीक्षक प्रकाश अर्याल व सशस्त्र महानिरीक्षक सिंह बहादुर श्रेष्ठ कन्हय् बुधवाः निसें ३० वर्षे कार्यकालया हुनिं अवकाश कयादीत्यंगु दु ।
प्रहरी महानिरीक्षक बढुवा यायेबलय् न्ह्याब्लें विवाद जुया वयाच्वंगु खःसां थुगुसी धाःसा थज्याःगु छुं विवाद मवयेक हे बढुवा जूगु खनेदु ।
प्रहरी महानिरीक्षक जूम्ह खनाल अप्वः चर्चाय् वयाच्वनीम्ह अधिकारी खः । नेपाःया फुटबलय् म्याच फिक्सिङ काण्डया पर्दाफास याःम्ह खनाल हे खःसा नांजाःम्ह डन कुमार श्रेष्ठ घैंटेया इन्काउन्टर याःम्ह खनाल हे खः ।
खनाल थौंकन्हय् ट्राफिक प्रहरी प्रमुख जुयाच्वनादीम्ह खः ।
LEAVE YOUR COMMENTS