नीलबाराही प्याखनय् न्हू पुस्ता मवल

थिमि – मध्यपुर थिमि नगरपालिका अन्तर्गत बोडेय् क्यनीगु कठिन नीलबाराही प्याखं शनिवाः क्वचाल । प्याखं क्यनेगु निंतिं न्हू पुस्ता तयार जुइमफुगुलिं द्यः प्याखं गण हे म्हो यायेमाःगु अवस्था वल । थुगुसी २०१५ सालंनिसें मदिक्क प्याखं हुला वयाच्वंपिं मध्ये सिंह जुइम्ह बाला छम्ह व कुमारी जुइम्ह किला छम्ह तसकं म्हं मफुगुलिं उपिं गणय् सहभागी जुइ मफुत ।

उकिं झिंगुम्ह दयेमाःगु उगु गण प्याखं झिंन्हय्म्ह जक तयाः चले याःगु खः ।कँय् बाजं पुइपिं न्हूपिं तःसां गण प्याखं हिलीगु इलय् सकलें हे हिलेमाः तर न्हूगु पुस्ता तयार मजूगु कारणं थौंकन्हय् नं तसकं ज्याथपिंसं उगु प्याखं हुलाः थ्व द्यःप्याखं चले यानाच्वंगु दु ।

अदुवा, जयना, किला, बाला व ध्वं परिवारया श्रेष्ठ जातिं चले यानातःगु थुगु प्याखनय् निम्ह चिलाख ज्वनीपिं धाःसा ज्यापु समुदायं हे तयेगु यानाच्वंगु दु । शनिवाः खासि त्वालय् च्वंगु नीलबाराही देगःया नापं प्याखं क्यनाः थुगुसीया निंतिं प्यन्हुयंकं न्ह्याःगु कठिन नीलबाराही प्याखं क्वचायेकूगु खः ।

थुगुसी झिंनिदँया मेला नं जूगु ल्याखं विशेष रुपं उगु प्याखं क्यनेज्या जूगु खः । प्याखंया स्वन्हुकुन्हु महालक्ष्मी द्यःथाय् प्याखं क्यने धुंकाः खासि त्वालय् प्याखं क्यंगु इलय् कँय् बाजं पुइपिं इलय् मथ्यंगु कारणं छझाः ल्हाः तयाः ल्वापु नं जुल ।