नुवाकोट महोत्सवय् लाखे प्याखंया आकर्षण
येँ(नेपालभाषा टाइम्स)- नुवाकोट उद्योग वाणिज्य संघया ग्वसालय् वंगु वालय् न्हय्क्वःगु नुवाकोट महोत्सव जुल । संघया ग्वसालय् फागुन ३ गते जूगु महोत्सवया झ्वलय् जिल्लास्तरीय लाखे प्याखं कासा जूगु खः ।
नुवाकोटया पिपलटारय् जूगु महोत्सवय् लाखे प्याखं विशेष आकर्षणया रुपय् दुगु खः । लाखे संस्कृतिया प्रवद्र्धन यायेगु ल्याखं महोत्सवय् कासाया रुपय् लाखेयात प्राथमिकता बियागु लाखे प्याखं कासा उपसमितिया संयोजकलिसें संघया कोषाध्यक्ष दिनेशकुमार श्रेष्ठं कनादिल । लाखे प्याखंलिसें अमूर्त सम्पदाया सांस्कृतिक धरोहरया रुपय् दुगु नखःचखःयात जीवन्त याना तयेगु थःपिनिगु दायित्व जूग्ुलिं लाखे प्याखंया ग्वसाः ग्वयागु वय्कलं कनादिल ।
नुवाकोटय् विशेष यानाः नाग पंचमिनिसें कृष्ण जन्माष्टमितक थनया नेवाः समुदायं थःथःगु थासं लाखे प्याखं पिथनेगु याना वयाच्वंगु दु । लाखे प्याखं थाय् कथं फरक फरक शैलीया जूसां बुलुहुं थ्व प्याखं लोप जुया वनीगु अवस्थाय् थ्यंगुलिं थ्व प्याखंप्रति आकर्षण अप्वयेकेत व प्रोत्साहन यायेत थुकथंया महोत्सवं ग्वाहालि याइ धइगु अपेक्षा यानागु संघया वरिष्ठ उपाध्यक्ष गीता अमात्यं कनादिल । लाखे प्याखंया संवद्र्धन व प्रवद्र्धनया निंतिं महोत्सवय् लाखे प्याखं कासा यानागु वय्कलं कनादिल ।
कासाय् मचांनिसें ज्याथपिनिगु पुचलं उत्साहजनक रुपं ब्वति काःसां विचाः याःथें प्याखं पुस्तान्तरण धाःसा जुइ मफयाच्वंगु स्थानीयवासीया धापू दु । स्थानीय बेलकोटगढी नगरपालिका १० वडाया सुन्दरलाल मानन्धरं लाखे प्याखं ल्याय्म्ह पुस्ताया दथुइ थ्यनामच्वंसां थुकियात ज्याथःपिंसं हे ल्यंकातःगु धयादी । थुकथंया महोत्सवय् लाखे प्याखंयात नं प्राथमिकता बिउगुलिं थःपिंत थप उत्साह ब्वलंगु वय्कलं कनादिल ।
कासाय् बट्टार लाखे प्याखं पुचः न्हाप, पिपलटार लाखे प्याखं पुचः कोलोनी लिउ, बेलकोटगढी लाखे प्याखं पुचः लियांलिउ लाःगु खःसा विदुर लाखे प्याखं पुचः व शिवालय लाखे प्याखं पुचलं हःपाः सिरपाः त्याकेत ताःलाःगु दु । कासाय् न्हापयात नीन्याद्व, लिउयात झिंन्याद्वः, लियांलिउयात झिद्वः व हःपाःयात न्याद्वःतका दांलिसें दसिपौ लःल्हाःगु खः ।
LEAVE YOUR COMMENTS