ख्वपय् नगरवासीया ग्वाहालिं अक्सिजन प्लान्ट स्थापना
ख्वप( ख्वप नगरपालिकां संचालन याना वयाच्वंगु ख्वप अस्पतालय् अक्सिजन प्लान्ट स्थापना याःगु दु । नगरपालिकां संचालन यानाच्वंगु अस्पतालय् अक्सिजन प्लान्ट स्थापनाया निंतिं स्थानीय जनतां आर्थिक ग्वाहालि याःगु खः ।
अस्पतालय् अक्सिजन प्लान्ट जडानया निंतिं ख्वप नगरवासीलिसें मेमेपिंसं नं ग्वाहालि याःगु खः । ख्वप नगरपालिकां नवनिर्मित अस्पताल भवनय् छगू करोड २३ गू लाख लागतय् जडान याःगु अक्सिजन प्लान्टया नेपाल मजदुर किसान पार्टी (नेमकिपा)या अध्यक्ष नारायणमान बिजुक्छेँ रोहितं प्लान्टया स्वीच तियाः उलेज्या यानादीगु खः । प्लान्ट जडान लिपा ख्वपयात आवश्यक स्वयां अप्वः अक्सिजन उत्पादन जुइगु व अप्वःगु अक्सिजन सिलिन्डर ज्वना वइपिंत नं जायेका बीगु खँ धाःगु दु ।
नगरपालिकां अस्पतालया कोभिड युनिटया निंतिं आवश्यक अक्सिजन व मेमेगु आवश्यक स्वास्थ्य उपकरण व्यवस्था यायेत धासें ग्वाहालिया निंतिं इनाप याःगु खः । नगरपालिकाया इनापकथं प्रकोप व्यवस्थापन कोषय् न्यागू करोड ग्वीस्वंगू लख ग्वीच्याद्वः तकां स्वयां अप्वः जम्मा जुइधुंकूगु जानकारी उगु इलय् बिउगु खः ।
नगरपालिकाया इनापकथं थीथी संघसंस्था, सहकारी संस्था, मनकारी दातापाखें ग्वाहालि याःगु खःसा ग्वाहालि वयेगु क्रम अझं न्ह्यानाच्वंगु नगरपालिकां जानकारी बिउगु दु । थ्व हे झ्वलय् वंगु मंगलवाः छन्हुं हे १२ गू लाख ख्वीखुद्वलं मल्याक आर्थिक ग्वाहालि प्राप्त जूगु नं नगरपालिकां न्ह्यथंगु दु ।
अक्सिजन प्लान्ट तयेत छगू करोड पीछगू लख नीन्याद्वः स्वीकृत जूगुलिइ छगू करोड नीस्वंगू लख स्वीखुद्वः तका खर्च जूगु जानकारी अस्पताल प्राविधिक शाखां जानकारी बिउगु दु ।
प्लान्ट जडानया दक्वं खर्च कोषं हे यायेगु जुइ धासें बियादिसें नगरप्रमुख सुनिल प्रजापतिं आः निगः भेन्टिलेटर, न्यागू आइसीयु बेडया निंतिं टेण्डर आह्वान यायेगु नापं आवश्यक मेमेगु स्वास्थ्य सामग्री न्यायेत नं पहल जुयाच्वंगु जानकारी बियादिल ।
थ्व हे झ्वलय् अस्पतालयात नगरपालिकालिसे भगिनी सम्बन्ध स्थापना जूगु चीनया तिब्बत स्वशासित क्षेत्र शान्नान सहरं छगः भेन्टिलेटर, ५० गू आईसीयु बेड, ५० गः अक्सिजन कन्सन्टे«टर व १०० गः अक्सिजन सिलिण्डर ग्वाहालि याःगु दु ।
LEAVE YOUR COMMENTS