धरहरा दयेकेगु टेण्डर हानं स्थगित
येँ – धरहरा दयेकेगु निंतिं आह्वान याःगु बोलपत्रया आर्थिक प्रस्ताव चायेकेत क्वःछिनातःगु ई च्याक्वःगु पटक नं स्थगित जूगु दु । पटक पटक आर्थिक प्रस्ताव दिउगुलिं धरहरा पुनःनिर्माण ज्या अन्योल जूगु दु । राष्ट्रिय पुनःनिर्माण प्राधिकरणं असार मसान्तय् हे शिलान्याश यायेगु धाःसां नं भदौया निगूगु वालय् तकं प्रस्ताव चायेके फयाच्वंगु मदु ।
वंगु वैशाख ३१ गते प्राधिकरणं धरहरा दयेकेगु सम्बन्धी सुचं पिथंगु खः । सुचं बिउगु इलय् खुगू प्रस्ताव पेश जूगु खः । प्रस्तावया प्राविधिक मुल्यांकन यानाः प्राधिकरणं न्यागू निर्माण कम्पनी ल्यःगु खः । न्यागू निर्माण कम्पनीया आर्थिक प्रस्ताव असार २६ गते चायेकेगु धकाः असार २० गते सुचं पिकाःगु खः ।
थुकिया दथुइ असार २६ गते निसें न्हय्क्वः तक प्रस्ताव चायेकेगु ज्या स्थगित जुइधुंकूगु दु । च्याक्वःगु पटक मंगलवाः क्वःछिनातःगु मिति नं सुचं पिकयाः भदौ १७ गते आइतवाः चायेकेगु धकाः मिति सारे यायेधुंकूगु दु ।
प्राविधिक प्रस्ताव पास जूगु कम्पनी मध्ये गुगुं छगू कम्पनीया भ्वं शंकास्पद दु धकाः प्रधानमन्त्री व मन्त्रिपरिषदया कार्यालयय् उजुरी लाःगुलिं प्रस्ताव चायेकेगु मिति दिनाच्वंगु खः । थ्व सम्बन्धय् छानविन यानाः प्रतिवेदन प्रधानमन्त्री व मन्त्रिपरिषदया कार्यालय पेश यायेधुनागु खँ सम्पदा संरक्षण सार्वजनिक भवन तथा पूर्वाधार महाशाखा प्रमुख राजुमान मानन्धरं जानकारी बियादिल ।
प्रधानमन्त्री कार्यालयपाखें प्रतिवेदन पेश जुइधुंकाः प्रस्ताव चायेकि धकाः पौ मवःगुलिं स्थगित यायेमाःगु अवस्था वःगु खँ प्राधिकरणं धाःगु दु । प्राविधिक प्रस्ताव पारित जूगु निर्माण कम्पनीइ जेइक÷लामा जेभी, सिआर ५ सिइसी÷ स्वच्छन्द जेभी, कुमार÷सिएफइसी जेभी, जिआइइटीसी÷रमन जेभी, सिआइसिओ÷कालिका÷ रसुवा जेभीया जूगु खँ सहसचिव मानन्धरं कनादिल ।
LEAVE YOUR COMMENTS