राष्ट्रपतिइ महन्थ ठाकुरया दावी

येँ (नेपालभाषा टाइम्स)- लोकतान्त्रिक समाजवादी पार्टी नेपालया अध्यक्ष महन्थ ठाकुरं थःत राष्ट्रपति दयेकेमाः धइगु प्रस्ताव ज्वनाः म्हिगः प्रधानमन्त्री पुष्पकमल दाहालयात नापलानादीगु दु ।

लोसपाया म्हिगः च्वंगु शीर्ष नेताया बैठकं अध्यक्ष ठाकुरयात राष्ट्रपतिइ प्रस्ताव यायेगु निर्णय यायेवं वय्कः थ्वहे प्रस्ताव ज्वनाः प्रम दाहालयात नापलाः झाःगु खः ।

वय्कःलिसे वरिष्ठ नेता राजेन्द्र महतो, शरतसिंह भण्डारी, कार्यकारिणी दुजः अनिलकुमार झा, सर्वेन्द्रनाथ शुक्ला नं झाःगु खः । वय्कःपिंसं ठाकुरया पक्षय् राष्ट्रिय सहमति दयेकेत प्रम दाहालयात इनाप याःगु खः ।

राष्ट्रपतिया नामय् कांग्रेस, एमाले व माओवादी दथुइ सहमति मजुयाच्वंगु इलय् ठाकुरयात नां प्रस्ताव यायेत्यंगु खः । लोसपां कांग्रेस सभापति शेरबहादुर देउवा व एमाले अध्यक्ष केपी ओलीयात नं ठाकुरयात राष्ट्रपतिइ समर्थन यायेत इनाप यायेत्यंगु दु ।

प्रधानमन्त्री नापलायेधुंकाः ठाकुरं आः केपी ओली व शेरबहादुर देउवा नं नापलायेगु तयारी यानाच्वंगु खँ सीदुगु दु । लुमंकेबहः जू, नेपाः भ्रमणय् वःम्ह भारतीय विदेश सचिव विनयमोहन क्वात्रां न्हूम्ह राष्ट्रपतिया रुपय् ठाकुरया नां प्रस्तावित यानादीगु खः ।

थ्वहे झ्वलय् नेकपा एकीकृत समाजवादी पार्टीया अध्यक्ष माधव नेपालं राष्ट्रपति बारे थम्ह अझ नं छुं सोचे मयानानिगु खँ धयादीगु दु । म्हिगः दाङय् जूगु पत्रकार सम्मेलनय् न्ववासें वय्कलं थःत राष्ट्रपति जुइत आः तक गनं नं आधिकारिक प्रस्ताव मवःनिगु खँ नं धयादीगु खः ।

वय्कलं थौंकन्हय् राष्ट्रपति बारे बजारय् अप्वः हल्ला जुयाच्वंगु धासें धयादिल, ‘चाहना तयेगु खँ बिस्कं खः, जिं छु यायेगु धइगु सोचे मयानानि, पार्टीं नं छु यायेगु धकाः निर्णय मयाःनि ।’

वय्कलं थुगुसी ‘पावर सेयरिङ’ य् थःगु भूमिका महत्वपूर्ण जुइ धासें न्ह्याबलें मेपिनिगु निंतिं बलिदान जुइगु स्थिति आः मजुइगु खँ नं धयादिल ।
अथे हे राष्ट्रपतिया नितिं बृहत सहलह आवश्यक दु धासें वय्कलं एमाले अध्यक्ष ओलीं थःत राष्ट्रपति दयेकेत याःगु प्रस्ताव बारे धयादिल, ‘गुलिखे खँयात पर्दा दुने तया तयेगु हे पाय्छि जुइ ।’

चुनाव न्ह्यः तक राष्ट्रपतिया निंतिं नेकपा (एस) या नेता झलनाथ खनालया नामय् कांग्रेस व माओवादी दथुइ सहमति जूगु खः तर चुनावय् खनाल पराजित जुइवं थ्व खँ ध्याकुनय्लाः वन ।