सञ्चारमन्त्रीयात २१ म्ह सम्पादकया ज्ञापन

येँ – थीथी सञ्चार माध्यमय् आवद्ध नीछम्ह सम्पादकतय्सं मिडिया काउन्सिल विधेयक संविधानया मर्म अःखः जूगु निष्कर्ष पिकाःगु दु । बिहीवाः छगू मंकाः वक्तव्य जारी यासें सम्पादकतय्सं ‘संविधानं सुनिश्चित यानातःगु पूर्ण प्रेस स्वतन्त्रता थ्व विधेयकं संकुचित धाइ धइगु जिमिगु निष्कर्ष दु’ धाःगु दु ।

सरोकारवालालिसे सहलह मयासे हःगु मिडिया काउन्सिल विधेयक लित कयाः थःपिंलिसे उकिया बारे सहलह यायेत नं सम्पादकतय्सं सरकारयात माग याःगु दु । मेखे सरकारं धाःसा मिडिया काउन्सिल सम्बन्धी विधेयक लित मकायेगु खँ धाःगु दु । सञ्चारमन्त्री गोकुल बास्कोटां मिडिया काउन्सिल विधेयक थःगु प्रक्रियाय् न्ह्याःवनीगु खँ धयादीगु दु ।

वय्कलं व्यवसायिक शुद्धता, सुरक्षा, मर्यादा व अभिव्यक्ति वा लेखन स्वतन्त्रता सनिश्चित यायेगु ल्याखं वइगु गुगुं नं सकारात्मक खँयात सदां लसकुस याये धासें विधेयक लित मकायेगु खँ धयादीगु खः । तर सरोकारवालातय्सं थुकी तःगु सुझाव धाःसा विधेयकय् कःघायेगु बचं नं मन्त्री बास्कोटां बियादिल ।

थ्वहे झ्वलय् म्हिगः सत्तारुढ पार्टी नेकपालिसे आवद्ध पत्रकारतय् संस्था नेपाल प्रेस संगठनपाखें नं मन्त्री बास्कोटायात छगू ज्ञापनपत्र बिसें विधेयक लित कायेत माग याःगु दु ।