उदयपुरय् आशंका याःपिं ८म्हेसति हे कोरोना जूगु पुष्टि

येँ – कोरोना भाइरस (कोभिड-१९)या संक्रमणया आशंका याःपिं उदयपुर त्रियुगा नगरपालिकाय् च्वनाच्वंपिं ८म्हेसित हे संक्रमण जूगु पुष्टि जूगु दु ।

मंगलवाः ८म्हेसिया रिपोर्ट शंकास्पद जुइवं हानं परीक्षण यायेगु नितिं धरानस्थित बीपी कोइराला स्वास्थ्य विज्ञान प्रतिष्ठानय् यंकाः पिसिआर विधिपाखें परीक्षण याःगु खः । अन याःगु परीक्षणय् ८म्हेसिया हे रिपोर्ट पोजेटिभ वःगु खः । आशंका याःपिं ८म्ह बाहेक उदयपुरय् मेम्ह छम्ह नं संक्रमित जूगु दु ।

थ्वस्वयां न्ह्यः थौं हे उदयपुरय् मेम्ह छम्ह ३३दँया मिजंयात नं कोरोना भाइरसाया संक्रमण जूगु पुष्टि जूगु खः । स्वास्थ्य तथा जनसंख्या मन्त्रालयं धरानस्थित विपी कोइराला स्वास्थ्य विज्ञान प्रतिष्ठानय् परीक्षणा याःपिं ८म्ह व टेकुस्थित राष्ट्रिय जनस्वास्थ्य प्रयोगशालाय् परीक्षण याःपिं २म्हेसित संक्रमण जूगु पुष्टि याःगु दु । थ्वनापं नेपालय् कोरोनाया संक्रमिततय् ल्याः ४१म्ह थ्यंगु दु ।

उदयपुरया भुल्केस्थित छगू मस्जिदय् दुपिं १३म्ह कोरोना संक्रतितय् सम्पर्कय् वयाः थौं थप १०म्हेसित कोरोना भाइरसया संक्रमण जूगु पुष्टि जूगु दु । वंगु शुक्रवाः भुल्केस्थित मस्जिदय् दुपिं १६म्ह मध्ये छक्वलं १२म्हेसित कोेरोनाया संक्रमण जूगु खः । लिपा मेम्ह छम्हेसित नं संक्रमणया पुष्टि जूगु खः ।