राजोपाध्याय समाजया दँमुँज्या व सम्मान

यल – राजोपाध्याय समाजया न्याक्वःगु दँमुँज्या व सम्मान ज्याझ्वः जुल । समाजया नायःलिसें नांजाःम्ह संगीतकःमि अमरराज राजोपाध्यायया सभापतित्वय् उगु ज्याझ्वः जूगु खः । यल महानगरपालिकाया प्रमुख चिरिबाबु महर्जन मूपाहांकथं झायादीगु ज्याझ्वलय् वय्कलं नेपालभाषया कलाः ख्यःलिसें साहित्यया क्षेत्रय् बियादीगु योगदानयात कयाः समाजया दुजःतकं जुयाच्वनादीम्ह सुशील राजोपाध्याययात दोसल्लां न्ययेकाः हनादीगु खः ।

नापं २०७४ सालया एसइइइ परीक्षाय् उत्कृष्ट ल्याः हयादीपिं समाजया छात्र–छात्रायात हनापौ लःल्हासें सम्मान यानादीगु खः । ज्याझ्वलय् नवासें मूपाहां महर्जनं नेवाः संस्कृति व सम्पदा च्वन्ह्याकेगु ज्याय् समाजं म्हिता वयाच्वंगु भूमिकायात कयाः च्वछायादीगु खः । वय्कलं यल मनपां संस्कृति व सम्पदाया अध्ययन अनुसन्धान याइपिनिगु निंतिं बजेटया व्यवस्था यानागु जानकारी बियादिसें यलया संस्कृति, सम्पदाया बारे अध्ययन अनुसन्धान यायेत नं इनाप यानादिल ।

पाहांकथं झायादीपिं थीथी जातीय संस्थाया प्रतिनिपिंसं नं नुगःखँ प्वंकादीगु ज्याझ्वलय् समाजया मूछ्यांजे विराजकाजी राजोपाध्यायं वार्षिक व दांभरिं जयन्ती राजोपाध्यायं आर्थिक प्रतिवेदन न्ह्यब्वयादीगु खः ।