ने. सं. ११४४ ञलाथ्व नवमी -

प्रव्रज्याभिषेक विषयय् प्रवचन

येँ (नेपालभाषा टाइम्स)- शाक्य, वज्राचार्य समुदायय् यायेमाःगु छगू कुल परम्परा वा संस्कार प्रव्रज्याभिषेकया विषययात कयाः प्रवचन ज्याझ्वः जुल । केशचन्द्र महाविहार संरक्षण समाजया ग्वसालय् वंगु माघ २८ गते शनिवाः जूगु ज्याझ्वलय् बौद्ध विद्वान प्रा. शान्तश्रीरत्न वज्राचार्यं उगु प्रवचन बियादीगु खः ।

शाक्य वज्राचार्य कुलपुत्रपिंत अनिवार्यकथं यायेमाःगु प्रव्रज्याभिषेक छु खः ? थ्व छाय् यानातःगु ? धइगु विषयय् केन्द्रीत जुयाः प्रवचन बियादीगु खः । प्रवचनया झ्वलय् वय्कलं क्रिया संग्रह, क्रिया समुच्चय सफूया विशेषता कनादिसें क्रिया समुच्चयया लिधंसाय् वज्रयानी समुदाययापिंसं सकतां पुजाआजा याना वयाच्वंगु खँ कनादिल । लिसें वय्कलं क्रिया संग्रहय् झिगू कर्मया खँ दुथ्याकातःगु व उकीमध्ये स्वंगू मिसापिंत जक याइगु, स्वंगू मिजंतय्त जक याइगु व ल्यं दुगु प्यंगू मिसा व मिजंतय्त याइगु कर्म खः धासें उकिया बारे जानकारी नं बियादीगु खः ।

दशकर्मया बारे बांलाक खँ थुइके सीकेमाःगु खँय् बः बियादिसें सफूया बारे बांलाक जानकारी काये फःसा जक प्रव्रज्या सम्बरया बारे नं स्पष्ट जुइ धयादिल । शाक्य वज्राचार्य कुलय् प्रव्रज्या सम्वर यायेगु धइगु मस्तय्त बुद्ध, धर्म व संघया शरणय् यंकेगु खःसा दशकर्म यायेगु धइगु बोघिसत्वया रुपय् यंकेगु कुतः यायेगु खः धयादिल ।

प्रवचनया झ्वलय् वय्कलं कलेशावरण, ज्ञेयावरणलिसें बुद्ध धर्मया ख्यलय् सयेका सीका तयेमाःगु आपालं ज्ञानया खँ नं कनादीगु खः ।
इतुंबहाःया मू थाय्पा मणिरत्न शाक्यं नं नुगःखँ तयाबिज्याःगु ज्याझ्वलय् मन्जिव शाक्यं प्रा. वज्राचार्यया म्हसीका न्ह्यब्वयादीगु खः ।