नेपाल संवत सम्वन्धी न्हूगु एप्स

थिमि – शंखधर राष्ट्रिय प्रतिष्ठानया ग्वसालय् नासा नाप समन्वय यानाः नेपाल संबत् सम्वन्धी न्हूगु एप्स सार्वजनिक याःगु दु । थ्व ऐप्सया ग्वाहालिं नेपाल संवत्यात तयेगु लागिं विक्रम संवत् वा ईश्वी संवत् मध्ये छुं छगू मिति तल धाःसा उकियात तत्काल नेपाल संवत् हिले फइगु जूगु दु । थ्व एप्सय् विक्रम संवत्या जक मिति तल धाःसा नेपाल संवत्या तिथि व ईश्वी संवत्या तिथि स्पष्ट वइ । भाजु शौनक रंजितकारं अन्तर्राष्ट्रिय ज्योतिष संस्था नासा नापं समन्वय यानाः थुगु एप्स तयार यानादीगु खः ।

शंखधर राष्ट्रिय प्रतिष्ठानया हलय् जूगु पत्रकार सम्मेलनय् संस्थाया अध्यक्ष चन्द्रकृष्ण श्रेष्ठं थुगु एप्स छ्यलाः संसारन्यंकं च्वंपिं सकसिनं थःगु छगू जक जन्म तिथि छुं छगू संवत् कथं चूलात धाःसा उकियात हे थीथी मेमेगु संवत्पाखें तिथि मिति कायेफइगु जानकारी बियादिल । संवत् बारे तसकं दुग्यंका अध्ययन यानालि झिंछसः दँ न्ह्यः हे वैज्ञानिक ढंगं नेपाल संवत तयार जुयाच्वंगु अजू चायेपुगु खँ जूगु भाजु रंजितकारं स्लाइड मार्फत् जानकारी बियादीगु खः । थुगु एप्स न्हूदँ कुन्हु चरिकोट, पोखरा, येँ नापं थीथी जिल्लां छक्वलं सार्वजनिक यायेत्यंगु दु । थुकी रञ्जना लिपि, देवनागरी लिपि व रोमन लिपि नं छ्यलेफइगु ब्यवस्था दु ।