पार्किङ मतःसा आन्दोलन यायेगु ख्याच्वः
येँ (नेपालभाषा टाइम्स)÷दरबार मार्गय् तत्काल पार्किङया व्यवस्था यायेत येँ महानगरपालिकायात दरबारमार्ग विकास बोर्डं माग याःगु दु । माग सम्बोधन मजुल धाःसा महानगरविरुद्ध चरणवद्ध आन्दोलन यायेगु ख्याच्वः नं बोर्डं बिउगु दु ।
बोर्डं म्हिगः पत्रकार सम्मेलन यासें मनपां दरबार मार्ग क्षेत्रय् चीकूगु पार्किङ तत्काल कायम मयात धाःसा येँमनपा विरुद्ध आन्दोलन यायेगु ख्याच्वः बिउगु खः । बोर्डं वंगु ताः इलंनिसें दरबार मार्ग क्षेत्रय् वडा कार्यालय व ट्राफिक प्रहरीया समन्वयय् सतकया छगू लाइनय् पार्किङ याना वयाच्वनागु व छगू लाइन पार्किङं ट्राफिक व्यवस्थापनय् छुं समस्या मजूगु खँ धाःगु दु । सहलह मयासे पार्किङ चीकेगु निर्णय माने मयायेगु खँ नं धाःगु दु ।
पत्रकार सम्मेलनय् न्ववासें बोर्डया पुलांम्ह अध्यक्ष गोपाल कक्षपतिं स्मार्ट पार्किङ तयाः व्यवस्थित रुपय् पार्किङ जुयाच्वंगु इलय् येँमनपां आकाझाकां बन्द याःगु खँ धयादिल । येँमनपां बोर्ड लिसे सहलह यानाः तत्काल पार्किङया व्यवस्था यायेमाःगु माग नं वय्कलं यानादिल ।
उकथं हे वय्कलं मनपां आकाझाकां पार्किङ चीकूगुलिं दरबार मार्गया रौनकता व आगन्तुकतय्त असुविधा व व्यापार व्यवसाय लाइगु प्रभावया विषय बिचाः मयाःगु द्वपं नं बियादीगु दु ।
वय्कलं दरबार मार्ग क्षेत्रं पार्किङ चीकेबलय् अनया व्यापार ५० प्रतिशत स्वयां अप्वः कुहां वःगु धासें पार्किङ मचीकूगु इलय् न्हिं १० करोड निसें १२ करोड तक व्यापार जुयाच्वंगु खःसा थौंकन्हय् ४ निसें ५ करोडय् लिकुंगु खँ नं धयादिल । वय्कलं पार्किङया व्यवस्था मदुगुलिं यानाः ग्राहक नं बछि स्वयां म्हो जूगुलिं व्यवसायीया लबः जक मखु सरकारयात वनीगु राजश्व नं म्हो जूगु खँ धयादीगु दु ।
LEAVE YOUR COMMENTS