जय वागेश्वरी देगः सर्वसाधारणया निंतिं खुल्ला

येँ(नेपालभाषा टाइम्स)÷ पशुपति लागाया ग्वलय् च्वंगु जयवागेश्वरी देगः पुनःनिर्माण लिपा सर्वसाधारणया निंतिं खुल्ला याःगु दु । २०७२ बैशाख १२ गतेया भुखाचं क्षति जूगु देगः पुनःनिर्माण सम्पन्न जुइवं वंगु शुक्रवाःनिसें सर्वसाधारणया निंतिं खुल्ला याःगु खः ।

वंगु शुक्रवाः सुथय् क्षमापुजालिसें प्राण प्रतिष्ठा यानाः देगः सर्वसाधारणया निंतिं खुल्ला याःगु खः । सर्वसाधारणया निंतिं देगः खुल्ला यायेगु झ्वलय् कन्याकुमारी व त्रिदेवीया नं पुजा याःगु खः । थुगु देगः स्वंगू करोड १४ गू लख लागतय् पुनःनिर्माण याःगु खः ।

भुखाय् ब्वःगु लछि मदुनिवं कोषं २०७२ जेठ ४ गते एड्भेन्चर टुर एण्ड ट्राभलयात देगः पुनःनिर्माणया निंतिं सैद्धान्तिक स्वीकृति बिउगु खः । २०७४ सालय् सम्झौता जूगु ३५ ला दतं नं दातां पुनःनिर्माणया ज्या न्ह्याके मफयेवं कोषं सम्झौता हे रद्द याःगु खः ।

अनंलि २०७५ माघय् तुलसी कन्स्ट्रक्सनलिसे निदँया दुने पुनःनिर्माण सिधयेकेगु शर्तय् सम्झौता याःगु खः । सम्झौताकथं देगः पुनःनिर्माणया निंतिं क्वथ्यंक थुनेगु झ्वलय् देगः दुने स्वगू गजू दुगु मेगु छगः देगःलिसें भैरवसहितया थीथी द्यः पिनिगु अंगः किपा दुगु संरचना लुया वःगु खः ।

ऐतिहासिक, पुरातात्विक महत्वया देगः न्हापा गथे खः अज्याःगु हे निर्माण सामग्रीया ज्वलं प्रयोग यानाः दयेकेमाःगु कानूनी व्यवस्थाकथं कोषयात सुझाप बियागु व वहेकथं देगः निर्माण जूगु पुरातत्व विभागया महानिर्देशकलिसें विज्ञ समितिया दुजः दामोदार गौतमं कनादीगु दु ।

देगःया चाः परीक्षण यानाः न्हापा थेंज्याःगु हे गुणस्तरीय चाँ देगः दनेमाःगु प्रतिवेदन बियागु व आवश्यककथं चा तयाः स्वायेधुंकाः पुनःनिर्माण याःगु इलय् दुने लुया वःगु अंगः किपा यथावत तयेगु ज्या जूगु वय्कलं जानकारी बियादिल ।

कलिगत संवत् ३२३२ लय् निर्माण शुरु जुयाः ४७ दँ लिपा ३२७४ य् निर्माण सम्पन्न जूगु जय वागेश्वरी देगः १९९० माघ २ गतेया तःभुखाचं नं क्षति जूगु खःसा अबलय् जिर्णोद्वार जक याःगु खः ।

प्रत्येक झिंनिदँय् छक्वः कलेवर हिलेगु चलन दु । कलेवर हिलीगु इलय् जय वागेश्वरी, गणेद्यः व भैरवया चाया न्हूगु मूर्ति दयेकातः थापं यायेगु याइ । जय वागेश्वरीया छ्यं ध्यने न्ह्यः गणेद्यःया मूर्ति दुगु खः । उकिं थनया गणेद्यःया मूर्तिइ स्वं मदुगु स्थानीयतय् धापू दु ।

स्वनिगलय् दकलय् न्हापां मानव वस्ती व सभ्यताया विकास जूगु थाय्कथं कयातःगु ग्वलया थुगु देगलय् नेपालय् सती प्रथा दयाच्वंगु इलय् तक जुजु महाराजा मंत धाःसा सती वनीपिं लानिपिनिगु दक्वं तिसा थन हयाः छायेगु याइ धइगु धापू स्थानीयवासी दथुइ लोकंह्वाः ।
द्यःयाथाय् छानातःगु तिसा लगायत सम्पत्तिया गुगुं नं अभिलेख मदुगु पशुपति क्षेत्र विकास कोषया पुलांम्ह पदाधिकारीं कनादीगु दु ।
थुगु देगः विश्व सम्पदाया धखलय् दुथ्यानाच्वंगु थासय् च्वंगु जूगुलिं प्राचीन स्मारक संरक्षण ऐनकथं देगः पुनःनिर्माण याःगु खः ।