स्वनिगलय् ख्वाउँइगु म्हो जुल

येँ- हरेक चिकुलाय् मनूतय्सं बिचाः याइ, थुगुसी ला तसकं चिकुसे च्वं । तर मखु । थुगुसीया चिकुलाय् न्हापा स्वयां चिकुइगु कम जूगु खँ मौसमविद्तय्सं धाःगु दु । न्हापा न्हापाया तुलनाय् थुगु दँय् चिकुइगु (ख्वाउँइगु) म्हो जूगु खँ वरिष्ठ मौसमविद्त मणिरत्न शाक्यं कनादीगु दु ।

वंगु प्यन्हु न्ह्यः येँया तापक्रम ०.५ डिग्री सेल्सियस थ्यंगु खः । अर्थात शून्य डिग्री हे मथ्यं । वयां कन्हय् कुन्हु हे हानं तापक्रम थहां वनेगु शुरु जुल । म्हिगः येँया न्यूनतम तापक्रम १ डिग्री थ्यन । थुकिया अर्थ थ्व तापक्रम आः शून्य थ्यनीगु सम्भावना मंत । छुं दँ न्ह्यः तक स्वनिगःया तापक्रम चिकुलां शून्य डिग्री तक थ्यनीगु खः । सन् १९७८ या जनवरी ११ य् स्वनिगःया तापक्रम कुहां वयाः माइनस ३.५ डिग्री तक थ्यंगु खः ।

मौसमविद् शाक्यया कथं जलवायु परिवर्तनया लिच्वः कथं थथे जूगु खः । थौंकन्हय् पृथ्वीया करिब ८–१० किलोमिटर च्वय् वायुमण्डलय् पृथ्वीया हे धू थहां वनाः सुपाँय् थेंज्याःगु छगू पत्र निर्माण जुयाच्वंगु दु गुकियात ‘एशियन ब्राउन क्लाउड’ धाइ । पृथ्वीं उत्सर्जन जुयाः थहां वनीगु क्वाःजःयात थ्व सुपाँय्या पत्रं आकासय् पित छ्वइ मखु । बरु अन हे ठक्कर नयाः पृथ्वीइ तुं लिहां वइ । अले थ्व धूया पत्र थः नं क्वानाच्वंगु दु । गुकिं यानाः पृथ्वीं थहां वंगु क्वाःजःयात थ्वं अझ क्वाकाः लित छ्वया हइ । थुकिया हे कारणं तापक्रम कुहां वनाः ख्वाउँइ मफुगु खः ।

लिसें हरेक दँय् चिकुलाय् नँ न्यानाः जुइगु वर्षा नं थुगुसी मजुइगु सम्भावना अप्वया वःगु दु । न्हापा जूसा मंसिर महिनाय् हे अज्याःगु वर्षा जुइगु खः । आः पुसया अन्तिम थ्यनेधुंकाः नं वर्षा मजूनि । म्हिगः तक देय्या छुं हे लागाय् वा वःगु मदुनि ।

थुकियात पृथ्वीया जलवायुइ वयाच्वंगु तःधंगु हिउपाःया रूपय् कायेमाःगु खँ नं भाजु शाक्यं कनादी । जलवायुइ वयाच्वंगु थ्व हिउपालं विश्वन्यंकं थीथी कथंया प्राकृतिक प्रकोपत नं हयाच्वंगु दु ।

सम्बन्धित बुखँ

LEAVE YOUR COMMENTS