थुगुसी गुंला पर्व नं मन्यायेकीगु

येँ (नेपालभाषा टाइम्स) – कोराना संक्रमणया कारणं थुगुसी लछि तक न्ह्याइगु गुंला पर्व नं स्थगित याइगु जूगु दु। गुंला पर्वया झ्वलय् गुंला लछियंकं बौद्धमार्गी नेवाःत थीथी बौद्धस्थलय् वनेगु चलन दु। थुकी येँयापिं बौद्धमार्गीत स्वयम्भू वनेगु परम्परा दु। उकी थीथी बहाःबहीयापिं मनूत तुतः ब्वनाः वनेगु याइसा थीथी त्वाःयापिं मनूत गुंला बाजं थानाः वनेगु याइ ।

कोरोना भाइरसया कारणं स्वयम्भूइ यक्व मनूत मुनेगु पाय्छि मजुइगु तायेकाः थुगुसी गुंलाबलय् बाजं थानाः स्वयम्भूइ मवनेगु निर्णय गुंला बाजं खलःतय्सं याःगु खः । गुंलाबलय् स्वयम्भूइ मवनेगु निर्णय जूगु कारणं आः पारुभ्वय्, बापारु आदि थेंज्याःगु पर्व नं मन्याइगु जूगु खः ।

स्वयम्भूइ गुंला बाजं थानाः वनीगु गुंलाबाजं व्यवस्थापन समितिया नकतिनि च्वंगु मुँज्यां थुगुसी गुंला पर्व मन्यायेकेगु निर्णय याःगु खः । स्वयम्भूइ गुंला पर्व मन्यायेकूसां थीथी त्वाःगुथितय्सं थःपिनिपाखें नियमित पूजा धाःसा छ्वयेगु निर्णय याःगु खँ नं सीदुगु दु ।