‘पासपोर्टय् रवि बचे जुइ फइ मखु’

येँ (नेपालभाषा टाइम्स)- रवि लामिछानेया नागरिकता व पासपोर्ट सम्बन्धी काण्डयात न्हापांखुसी सार्वजनिक यानादीम्ह ‘जनआस्था’ वाःपौया सम्पादक किशोर श्रेष्ठं लामिछानें नागरिकता काःसां पासपोर्ट सम्बन्धी काण्डय् धाःसा वय्कः बचे जुइ मफइगु खँ धयादीगु दु ।

म्हिगः तक करिब ५ लाख मनुखं स्वयेधुंकूगु छगू युट्यूब अन्तर्वार्ता बिसें सम्पादक श्रेष्ठं धयादीगु दु, ‘छिकपिंसं च्वयाः तयातइदिसँ, पासपोर्ट काण्डय् रवि बचे जुइ फइ मखु । वय्–कःयात जेलय् तयेगु वा जरिवाना पुइकेगु दण्ड जु हे जुइ ।’ श्रेष्ठ प्रेस काउन्सिलया अध्यक्ष जुयाच्वंगु इलय् लामिछानेयात प्रेस पास कायेत इनाप यानादीगु खः ।

उगु इलय् लामिछानें काउन्सिलपाखें प्रेस पास कायेमाल धाःसा बरु लँय् च्वनाः लाकमय् पालिस तयेगु ज्या याये धकाः हाथ्या बियादीगु खः । वयां लिपा श्रेष्ठं लामिछानेयाके निगू पासपोर्ट दुगु व नेपाः लिहां वयेधुंकाः नं न्हूगु नागरिकता मकाःनिगु लिसें स्वम्ह कलाः दुगु खँ सार्वजनिक यानादीगु खः ।