ने. सं. ११४४ कौलाथ्व दशमी - स्याक्वत्याक्व

तथाकथित विद्यार्थी नेताया क्वथाय् सुचुकातःगु राहत सामग्री जफत

किपू – त्रिभुवन विश्वविद्यालयय् च्वनाच्वंपिं विद्यार्थीपिंत राहत वितरण यानाच्वना धकाः दावी याना वयाच्वंम्ह तथाकथित विद्यार्थी नेता हेमराज थापाया क्वथां हे राहत सामग्री सुचकातःगु बरामद याःगु दु । किपू नगरपालिकाया मेयर रमेश महर्जनं थौं छगू पत्रकार सम्मेलन यासें थापाया क्वथां सामान बरामद यानागु जानकारी बियादीगु खः ।

मेयर महर्जनं धयादी कथं थापाया क्वथाय् राहतया सामग्री सुचुकातःगु धयागु सुचं वयेवं नगरपालिका, किपूया प्रहरी, स्थानीय जनप्रतिनिधि सहीत छापा मारे यानाः उगु सामान बरामद याःगु खः । वयागु क्वथाय् २५–२५ किलोया २२ बोरो जाकि, ७० लिटर चिकं, २५–२५ केजीया खुब्वरा दाल बरामद याःगु खः ।

थःगु क्वथाय् हे राहत सामग्री सुचुकातःम्ह उम्ह विद्यार्थी छुं न्हि न्ह्यः एभेन्युज टेलिभिजनय् न्ववायेगु झ्वलय् धाःसा थःपिं राहत इनाच्वनागु व किपू नगरपालिकां राहतया निंतिं छुं मबिउगु धकाः द्वपं बिया बिउगु खः ।

मेयर महर्जनं पत्रकार सम्मेलनय् न्ववासें थःपिंसं विद्यार्थी संगठन, त्रिविया पदाधिकारीपिं लिसे समन्वय यानाः विद्यार्थीपिंत इनेगु निंतिं राहत उपलब्ध याकागु खःसां उम्ह थापां धाःसां किपू नगरपालिका, मेयरया हे अपमान जुइकथं टेलिभिजन न्ववानाजूगु खँ नं धयादीगु दु ।

त्रिवि विद्यार्थीपिंत थप राहत इनेगु बारे थौं नगरपालिकाय् जुयाच्वंगु सहलहय् नं आकाझाकां थ्यंकःवःम्ह थापायात स्थानीय छम्ह मिसां किपूया बेइज्जत जुइकथं टेलिभिजनय् न्ववाःगु धकाः ब्वः बिउगु, तर थापां धाःसा थःत नगरपालिकाय् सःताः मेयरया कार्यकक्षय् तयाः दायेकूगु धकाः हाकनं टेलिभिजनय् न्ववाः जूगु धासें उकिया नं खण्डन यानादीगु दु ।

अथेहे वय्कलं थौंकन्हय्या विषम परिस्थितिइ नं ‘नयेमखंगु’ नामय् राजनीति यानाच्वंगु धासें उकियात कयाः खेद नं प्वंकूगु दु ।
वय्कलं नगरपालिकां समन्वय यानाः त्रिविया विद्यार्थीपिंत नं राहत इनागु धासें सुनां सुनां राहत काःगु दु धयागु रकेर्ड थःपिंके दुगु खँ नं धयादीगु दु । राहतया निंतिं नगरपालिकां नं ग्वाहालि याःगु जूसां राहत इनेगु ज्या यायेत विद्यार्थी संगठन व त्रिविया पदाधिकारीपिंत हे धयागु, तर उकिया म्यान्युट छगू यायेमफुगु कारणं नगरपालिकायात थुकथं आक्षेप बियाच्वंगु खँ नं वय्कलं स्पष्ट यानादीगु दु ।