ने. सं. ११४६ बछलागा एकादशी - अपरा एकादशी, चित्तधर हृदय या १२०क्वःगु बुदिं

‘सतक विस्तार मुद्दाय् तःधंगु प्रदर्शन हथाय् जुइधुंकल’

येँ – सतक विस्तार पीडितपिनि मुद्दाय् न्यायाधीशतय्त सरकार लिसें सञ्चार माध्यमतय्सं तकं दबाब बियाच्वंगु खँ धाःगु दु । येँया इचंगु नं लँ विस्तारया निंतिं छेँ थुनेत चिं तःवयेवं शनिवाः जूगु सहलहय् न्ववासें सतक विस्तार पीडितपिनि पाखें मुद्दा म्हिताच्वंम्ह वरिष्ठ अधिवक्ता शंकर लिम्बुं थ्व खँ धयादीगु खः । वय्कलं सरकार व संचार माध्यमया दबाबया कारणं न्यायाधीशत फयांफतले सतक विस्तार पीडितय् मुद्दा हे स्वये चाहे मजुयाच्वंगु व स्वःपिंसं नं अन्तरिम आदेश तकं मबियाच्वंगु खँ धयादिल ।

‘प्रधानमन्त्रीं हे न्यायाधीशत विकास विरोधी धकाः न्ववानादिल । अले प्रमुख सञ्चार माध्यमतय्सं नं पीडितया पक्षय् छुं फैसला जुलकि न्यायाधीशत विकास विरोधी धकाः च्वयाबिइगु । थुकिं यानाः न्यायाधीशतय्सं थ्व मामिलाय् तसकं दबाब महसुस यानाच्वंगु दु’ वय्कलं धयादिल ।

ज्याझ्वलय् न्ववासें मेम्ह अधिवक्ता जितेन्द्र वज्राचार्यं सतक विस्तार पीडितपिं सकलें छप्पँ जुयाः सतकय् हे पिहां मवयेकं सरकार गैरन्यायिक ज्यायात पने थाकुइगु खँ कनादिल । सरकारं अदालतया खँ तकं बेवास्ता यानाच्वंगु धासें वय्कलं आः जनता हे सतकय् कुहां वयेमाःगु खँ धयादिल ।

‘अदालतं मुआब्जाया सहमति मजुइकं छेँ थुने दइमखु धयागु आदेश बियातःसां सरकारं साँगाय् डोजर चले याःगु दु । सरकारं छथाय् निथाय् शक्ति छ्यलाः छेँ थुनाः मेथाय् च्वंपिंत नं ख्यायेत स्वयाच्वंगु दु । उकिं सकलें छप्पँ जुयाः छुं ई न्ह्यः माइतीघर मण्डलाय् याःगु प्रदर्शन थें शक्तिशाली प्रदर्शन याये हथाय् जुइधुंकूगु दु’ अधिवक्ता वज्राचार्यं धयादीगु दु ।

अथेहे ज्याझ्वलय् न्ववासें उपत्यकाव्यापी सतक विस्तार पीडित संघर्ष समितिया नायः सुमन साय्मिं गैरन्यायिक सतक विस्तारया ज्याय् कांग्रेस कम्युनिष्ट पार्टी सकलें छप्पँ जुयाच्वंगु धासें थुकिया विरुद्ध संघर्ष यायेत पीडितपिंसं पार्टीया ख्वाः स्वयाच्वने मजिउ धयादिल ।
इचुंगु शुक्रवाः छेँ थुनेगु निंतिं सछिखां मयाक छेँय् चिं तयाथकूगु खः । थन ६ मिटर दयाच्वंगु लँयात ९ मिटर दयेकेगु धकाः छेँ थुनेत चिं तयाथकूगु खः । थुकिं यानाः लँ सिथय् छेँ लाःपिंसं डेढ डेढ मिटर तक छेँ थुनेमालीगु अवस्था वयाच्वंगु दु ।