‘थारु जूगु कारणं हे रेशम जेलय् लाःगु’

येँ (नेपालभाषा टाइम्स)- नागरिक उन्मुक्ति पार्टीया अध्यक्ष रञ्जिता श्रेष्ठं रेशम चौधरीयात राजनीकि संरक्षण मदुगु कारणं हे मुद्दा तःगु खँ धयादीगु दु । प्रतिनिधिसभाया न्हापांगु बैठकयात सम्बोधन यासें वय्कलं धयादिल, ‘टिकापुर थारु आन्दोलनया छगू घटना खः । टिकापुरया घटना गुगुं बन्द क्वथा दुने जूगु घटना मखु । द्वलंद्वः मनूतय् भिडय् खनेमदुम्ह रेशम चौधरीयात थौं नं कारागारय् कुनातःगु दु । थारु जूगु कारणं हे थ्व राज्य सत्तां रेशमयात न्यादँ न्ह्यवंनिसें जेलय् तयातल ।’