सरकारया दायित्वं लिचिले मजियाः राजीनामा मबियागु खः– मन्त्री श्रेष्ठ

येँ (नेपालभाषा टाइम्स)- संस्कृति, पर्यटन तथा नागरिक उड्डयन मन्त्री जीवनराम श्रेष्ठं सरकार थःगु दायित्वपाखें लिचिले मजिउगु जूगुलिं चुनावय् बूसां नं थःपिंसं राजीनामा मबियागु खँ धया–दीगु दु । म्हिगः मन्त्रालयय् ग्वसाः ग्वःगु पत्रकार सम्मेलनय् सञ्चारकर्मीतय्सं तःगु जिज्ञासाया लिसः बिसें वय्कलं उगु खँ धयादीगु खः ।

वय्कलं प्रतिनिधिसभा दुजः निर्वाचन बुइधुंकाः थम्हंं राजीनामा बीत प्रधानमन्त्रीयात नापलानागु खःसा प्रधानमन्त्रीं सरकार थःगु दायित्वं लिचिले मजिउ धासें राजीनामा मबीत इनाप यानादीगुलिं थम्हं राजीनामा मबियागु खँ स्पष्ट यानादीगु खः ।

उकथं हे मन्त्री श्रेष्ठं आःया सरकार चुनावी सरकार जूगुलिं नैतिकवान जुयाः हे मेगु सरकारयात सत्ता हन्तान्तरण लिपा बिदा जुइगु खँ नं धयादीगु दु ।

वय्कलं नैतिक विषय ल्ह्वनाः राजीनामा बीबलय् सरकारय् वइगु चापया महत्वयात स्वयाः थःगु दायित्व पूवंकागु खँ धयादिल । लिसे वय्कलं चुनावी सरकारं न्हू वइगु सरकारयात जिम्मेवारी हस्तान्तरण यायेधुंकाः थःगु दायित्व पूवनी धकाः संविधानं परिकल्पना यानातःगु खँ नं धयादीगु खः ।