ज्यापु समुदायपाखें माष्टर, एम.फिल व पिएचडी याःपिंत सम्मान

येँ – ज्यापु महागुथि नेपाः, येँ महानगर समितिं छगू ज्याझ्वःया दथुइ ज्यापु समुदायपाखें माष्टर, एम.फिल व पिएचडी (विद्यावारिधी) यानादीपिंत हंगु दु । येँ महानगर समितिया नायः बाबुराजा महर्जनया सभापतित्वय् जूगु ज्याझ्वः राष्ट्रिय म्येँ हायेकाः शुरु जूगु खः ।

ज्याझ्वलय् मूपाहांकथं झायादीम्ह येँ महानगरपालिकाया मेयर विद्यासुन्दर शाक्यं त्वाःदेवाय् मत च्याकाः ज्याझ्वःया उलेज्या यानादीगु खः । ज्याझ्वलय् येँ महानगर समितिया नायः महर्जनं ज्याझ्वःया उद्देश्ययात कयाः थःगु नुगःखँ तयादीगु खः । ज्याझ्वःया मूपाहां शाक्यं ज्यापु समुदायपाखें मास्टर, एम.फिल. व पिएचडी यानादीपिंत हनापौ लःल्हानाः सम्मान यानादीगु खः ।

अथे हे ज्याझ्वलय् सगरमाथा आरोही कल्पना महर्जन व महेश्वर महर्जनयात नं ज्याझ्वलय् विशेष सम्मान याःगु खः । समितिया न्वक, शिक्षा व स्वास्थ्य कवः नापं हनेज्याझ्वःया कजि ज्ञानीबाबु सिंहं लसकुस यानादीगु ज्याझ्वलय् मूपाहां येँ मनपाया मेयर शाक्य, ज्यापु महागुथि नेपाःया संरक्षक नापं निवर्तमान नायः राजभाई ज्यापु, ज्यापु महागुथि नेपाःया नायः राजभाई जकःमि, सम्मानित व्यक्तित्व कल्पना महर्जन, पिंसं नं थःथःगु नुगःखँ तयादीगु खः ।

ज्याझ्वलय् पाहांकथं ज्यापु महागुथि नेपाःया निवर्तमान नायः राजभाई ज्यापु, वर्तमान नायः राजभाई जकःमि, संरक्षक विपेन्द्र महर्जन, संरक्षाक देबबहादुर महर्जन, ज्यापु सांस्कृतिक विकास कोषया नायः मंगलकृष्ण सिंह झायादीगु खः ।

अथे हे ज्याझ्वलय् येँ महानगरपालिकाया थीथी वडाया वडा अध्यक्षपिं रमेश डंगोल (५ वडा), शुद्ध डंगोल (७ वडा), दिनेशकुमार डंगोल (८ वडा), विकास डंगोल (१२ वडा), ईश्वरमान डंगोल (१५ वडा), न्हुछेकाजी महर्जन (१८ वडा), चिनीकाजी महर्जन (२२ वडा), मचाराजा महर्जन (२३ वडा), येँ मनपा हनुमानढोका दरवार क्षेत्र संरक्षण कार्यक्रम प्रमुख उदय पसःखलः, महागुथिया मू छ्यांजे मचाराजा महर्जन (मुसुंबहाः), ज्यापु महागुथि बहुउद्देश्यीय सहकारी संस्थाया कार्यवाहक नायः मचाराजा महर्जन (ओमबहाः), येँ महानगर समितिया निवर्तमान नायः रामबहदुर डंगोल, महागुथिया सांस्कृतिक संरक्षण कोष कवःया कजि शान्तराज महर्जनपिं नं पाहांकथं झायादीगु ज्याझ्वलय् येँ महानगर समितिया न्वकु नानीहिरा महर्जनं सुभाय् देछानादीगु खः।