ने. सं. ११४४ कौलाथ्व पारू - नःलास्वनेगु

अर्थमन्त्री विरुद्ध स्वम्ह पूर्व अर्थमन्त्री

येँ- अर्थमन्त्री जनार्दन शर्मा विरुद्ध एमाले आवद्ध स्वम्ह पुलांपिं अर्थमन्त्रीत मैदानय् कुहां वःगु दु । एमाले आवद्ध स्वम्ह पुलांपिं अर्थमन्त्रीपिं बिष्णु पौडेल, सुरेन्द्र शर्मा व डा. युवराज खतिवडां म्हिगः छगू मंकाः वक्तव्य जारी यासें देय्या अर्थतन्त्र स्यना वनाच्वंगु इलय् अर्थमन्त्री जनार्दन शर्मां राष्ट्र बैंकया गभर्नरयात निलम्बन यानाः देय्यात आर्थिक संकटपाखे घ्वानाछ्वःगु द्वपं बियादीगु दु ।

स्वम्हं पुलांपिं अर्थमन्त्रीतय्सं थःपिनिगु पालय् क्वातुका तयागु आर्थिक स्थितियात वर्तमान सरकारं स्यंकूगु व देशयात ताथ यायेत स्वःगु द्वपं नं बियादीगु दु । थःपिंसं सरकार त्वःतागु इलय् अर्थतन्त्र बांलाःगु अवस्थाय् दुगु खःसां आःया सरकारं उकियात स्यंकाः बजाःभाः थकाःगु, विदेशी मुद्राया सञ्चिती क्वपाःगु द्वपं बियादीगु खः । वय्कःपिंसं पिथनादीगु वक्तव्यय् थःपिनिगु पालय् मुद्रास्फीति ४ प्रतिशत स्वयां कम दुगु, विदेशी मुद्राया सञ्चिती १४ खर्ब तका दुगु खँ न्ह्यथँसें आः अवस्थायात विद्रुप याना बिउगु खँ धयातःगु दु ।

अथे हे राष्ट्र बैंकया गभर्नर महाप्रसाद अधिकारीयात कारवाही यानाः सरकारं गलत ज्या याःगु द्वपं नं वय्कःपिंसं बियादीगु दु । अर्थतन्त्र स्यनाः नेपाः नं श्रीलंका थें जुइगु खः लाकि धकाः चिउताः ब्वलनाच्वंगु इलय् अर्थ मन्त्रालय व राष्ट्र बैंक थवंथः सहलह ब्याकाः न्ह्याः वनेमाःथाय् अःखतं गर्भनरयात हे निलम्बन याना बिउगुलिं स्थिति झन् संकटपूर्ण जुइ फइगु अनुमान याना हःगु दु । सरकारं थःपिंसं यानातःगु गलत ज्यायात त्वपुइगु लागिं गभर्नरयात कारवाही याःगु द्वपं नं एमालें बिउगु दु ।

२० करोड काण्डं तनाव
राष्ट्र बैंकया गभर्नर महाप्रसाद अधिकारीयात निलम्बन यायेवं आः राष्ट्र बैंकया कार्यभार अनया डेपुटी गभर्नर डा. निर्मला तिम्सिनाया नेतृत्वय् वंगु दु । डा. तिम्सिना राष्ट्र बैंकया न्हापांम्ह मिसाम्ह डेपुटी गभर्नर खःसा आः वय्कः हे न्हापांम्ह कामु गभर्नर समेत जुइत ताःलाःगु दु ।

अमेरिकां नेपाः दुहां वःगु २० करोड दांया स्रोत खुले मजू धासें राष्ट्र बैंकं उगु ध्यबा रोके याना बीवं अर्थभन्त्री जनार्दन शर्मा व गभर्नर अधिकारीया दथुइ विवाद जूगु समाचार सार्वजनिक जूगु खः ।

स्रोत खुले मजूगु उगु ध्यबा सम्बन्धित मनूयात बिया बिउ धकाः अर्थमन्त्रीं गभर्नरयात दबाब बिउगु समाचार सार्वजनिक जुइवं थ्व सूचना मिडियाय् बिल धकाः सरकारं गभर्नरयात हे निलम्बन याना बिउगु खः । येँय् च्वनाच्वंम्ह छम्ह ३५ दँ दुम्ह ल्याय्म्हया नामय् अमेरिकापाखें २० करोड दां दुहां वःगु खः ।