मखं त्वाःया दुनेया लागाय् सीसी क्यामरा

येँ- येँ महानगरपालिका वडा नं. २४ अन्तर्गत मखं त्वाःया थीथी थासय् सीसी क्यामरा जडान यायेगु ज्या जूगु दु । बागमति प्रदेश पूर्वाधार साझेदारी ज्याझ्वः अन्तर्गत मखं त्वाःया दुनेया लागाय् सीसी क्यामरा जडान याःगु खः ।

बागमति प्रदेश सांसद राजेश शाक्यया प्रदेश पूर्वाधार साझेदारी ज्याझ्वःकथं उगु सीसी क्यामरा जडान याःगु खः । मखन क्रियाशील समूहपाखें सीसी क्यामरा जडान यायेगु ज्या क्वचाःगु जानकारी बीगु ल्याखं ग्वसाः ग्वःगु छगू ज्याझ्वलय् उकिया जानकारी बिउगु खः ।

समूहया नायः सुजनविलास वज्राचार्यया सभापतित्वय् जूगु ज्याझ्वलय् मूपाहां प्रदेश सांसद शाक्यं जनताया करयात सही थासय् सदुपयोग यायेकथं स्थानीयलिसे सहलह यानाः आवश्यकतायात ध्यानय् तयाः माःकथं ग्वाहालि याना वनेगु जुइ धयादिल ।

समूहया सचिव शैलेन्द्रविलास वज्राचार्यं लसकुस यानादीगु ज्याझ्वलय् २४ वडाअध्यक्ष बालकृष्ण श्रेष्ठया नं उपस्थिति दुगु खःसा मखं बहाःया सचिव सागरमान वज्राचार्य, २४ या वडा सदस्य विनोद तुलाधरं नुगःखँ प्वंकादीगु खः । मखं त्वाःया थीथी थासय् ताःई न्ह्यवंनिसें आपराधिक गतिविधि जुया वयाच्वंगुलिं सीसी क्यामराया जडानं अज्याःगु गतिविधि नियन्त्रण याये फइगु विश्वास प्वंकूगु दु ।

लिसें उगु इलय् प्रदेश सांसद शाक्यलिसें स्थानीयवासीं अन्तक्र्रिया नं याःगु खः ।