यःमरि पुन्हिया झ्वलय्् सम्पदा यात्रा
ख्वप (नेपालभाषा टाइम्स)- ख्वप नगरपालिकाया ग्वसालय् यःमरि पुन्हिया झ्वलय् सन्ध्याकालीन सम्पदा यात्रा जुल । उगु इलय् यःमरिया ब्वज्या, खाद्य उत्सव लिसें सांस्कृतिक ज्याझ्वः नं जूगु खः ।
ख्वप नगरपालिका ९ वडाया दत्तात्रयय् जूगु ज्याझ्वलय् मूपाहांकथं झायादीम्ह ख्वप नगरपालिकाया प्रमुख सुनिल प्रजापतिं यःमरिया ब्वज्या व खाद्य उत्सव ख्वप महोत्सवया पूर्वाभ्यास खः धयादिल । झी पुर्खा ब्वलंका थकूगु मूर्त व अमूर्त सांस्कृतिक सम्पदा झीगु थःगु हे सम्पत्ति खः धासें थुकिया महत्वया बारे न्हू पुस्तायात जानकारी बीमाःगु खँय् बः बियादिल ।
सांस्कृतिक सम्पदा व कलां जाःगु ख्वप देय्यात राष्ट्रिय व अन्तर्राष्ट्रियस्तरय् म्हसीकाः आन्तरिक व बाह्य पर्यटक दुकयाः आर्थिक गतिविधि अप्वयेकाः नगरवासीया जीवनस्तर थकायेत ग्वाहालि जुइगु विश्वास प्वंकादिल ।
वय्कलं थनिं निदँ न्ह्यः हे यायेगु धयागु ख्वप महोत्सव उगु इलय् कोभिड–१९या महामारीया कथं लिपांगु इलय् वयाः स्थगित यायेमाःगु जानकारी बियादिसें ई व परिस्थिति स्वयाः याकनं हे महोत्सव यायेगु नं जानकारी बियादिल ।
उपप्रमुख रजनी जोशीं थुकथंया ज्याझ्वलय् खने दुगु उत्साहपूर्ण सहभागितां ज्याझ्वः सफलतापूर्वक क्वचायेकेत ग्वाहालि जूगु धासें थज्याःगु ज्याझ्वलय् न्ह्याबलें नं नगरवासीया सहभागिता व ग्वाहालि दया च्वनेमाः धयादिल ।
ख्वपया पुलांगु लागा सांस्कृतिक क्षेत्र घोषणा जुइधुंकूगुलिइ आः ख्वप देय्यात हे सांस्कृतिक नगर घोषणा यायेत सकसिगुं ग्वाहालि व सुझाव आवश्यक दु धासें नगरया दक्वं ब्वनेकुथिइ १ निसें ८ गू तगिं तक नगरया सांस्कृतिक सम्पदा, परम्परागत कला, शीप, संस्कृति व प्याखं लगायतया विषयत दुथ्याकाः स्थानीय पाठ्यक्रम लागू यानाः अध्यापन याकेगु तयारी जुयाच्वंगु नं वय्कलं जानकारी बियादिल ।
वडाअध्यक्षद्वय कृष्णप्रसाद कोजू व रविन्द्र ज्याख्वं नं नुगःखँ तयादीगु ज्याझ्वलय् ज्याझ्वः ताःलाकेत थीथी कथं ग्वाहालि यानादीपिंत मतिनाया चिं नं लःल्हाःगु खः ।
LEAVE YOUR COMMENTS