प्रदेश ३ य् सरकार क्वःथलेगु तयारी
मुख्यमन्त्री विरुद्ध अविश्वासया प्रस्ताव यंकीगु ?
येँ – देशय् दुई तिहाइया सरकार वयेधुंकाः न्हापा न्हापा थें अविश्वासया प्रस्ताव तयाः सरकार क्वःथलेगु व हानं मेगु सरकार गठन यायेगु ज्या ला बन्द हे जुल । तर थथे सरकार अविश्वासया प्रस्ताव तयाः सरकार क्वःथलेगु अभ्यास धाःसा आः केन्द्रं सरे जुयाः प्रदेशपाखे वनाच्वंगु संकेत खने दया वःगु दु ।
देय्या राजनीतिक अवस्था शान्त दुसां प्रदेश नं. ३ य् धाःसा सरकार विरुद्ध अविश्वासया प्रस्ताव तयेगु तयारी जुयाच्वंगु खँ सीदुगु दु ।
थौंकन्हय् अन नेकपाया नेतृत्व यासें डोरमणि पौडेलया सरकार दुसा आः पौडेलया सरकार क्वःथलेगु लागिं स्वयम् नेकपा दुने हे चलखेल जुयाच्वंगु दावी सूत्रं याःगु दु ।
खास यानाः पुलांगु एमाले व माओवादी एकीकरण जुइधुंकाः प्रदेश ३ या संसद दुने नं न्हूगु समीकरण निर्माण जूगु जुयाः आः पौडेलया थासय् मेम्ह हे मुख्यमन्त्री जुइमाःगु माग वयाच्वंगु खँ सूत्रं धाःगु दु । पौडेल विरुद्ध अविश्वास प्रस्ताव हे धाःसां पारित जुइगु सम्भावना मदुसां थुकिया लागिं दुनें दुनें कुतः धाःसा जुयाच्वंगु खँ नं सूत्रं धाःगु दु ।
अविश्वास प्रस्ताव तयेगु थ्व ज्याय् थौंकन्हय् प्रदेशया पुलांम्ह मन्त्री लिसें सांसद केशव स्थापित दकलय् सक्रिय जुयाः लगे जुयाच्वंगु खँ नं धाःगु दु । थौंकन्हय् वय्कलं खुल्ला रुपं हे मुख्यमन्त्री पौडेलयात चीकेमाःगु व उकिया लागिं थःपिंसं तयारी यानाच्वनागु दु धकाः धायेगु यानाच्वंगु दु ।
पौडेल धुंकाः न्हूम्ह मुख्यमन्त्री नं थः हे जुइगु दावी नं वय्कलं याना च्वनादीगु दु । दत्या न्ह्यः प्रदेशया मुख्यमन्त्री ल्ययेत संसदीय दल दुने निर्वाचन जूबलय् अष्टलक्ष्मी शाक्य विरुद्ध मत तयाः पौडेलयात त्याकेगु ज्याय् स्थापितं हे भूमिका म्हितादीगु खःसा लिपा पौडेललिसे सम्बन्ध स्यनेवं पौडेलं वय्कःयात मन्त्री पदं चीका छ्वःगु खः ।
आः स्थापित पौडेलयात चीकेगु अभियानय् लगे जुयाच्वंगु खँ धाःगु दु । थ्व ज्याय् थःत अष्टलक्ष्मी शाक्यया नं समर्थन दुगु व उकिया लागिं थम्हं प्रधानमन्त्री केपी ओलीलिसे नं सेटिङ मिले यायेधुनागु दावी वय्कलं यानादीगु दु ।
मुख्यमन्त्री पौडेल व स्थापितया दथुइ प्रदेशया स्थायी राजधानी गन तयेगु खँय् मू रुपं विवाद दुगु खँ धाःगु दु । मुख्यमन्त्री पौडेल हेटौंडायात हे स्थायी राजधानी यायेमाः धइगु पक्षय् दुसा स्थापितं राजधानी पिने यंकेमाः धाइपिनि नेतृत्व यानाच्वंगु दु ।
LEAVE YOUR COMMENTS