पाकिस्तानी अलराउण्डर अफ्रिदीं एभरेष्ट प्रिमियर लिग म्हितीगु

एजेन्सी- पाकिस्तानया भेट्रान अलराउण्डर कासामि शाहिद अफ्रिदीं नेपालय् जुइगु एभरेष्ट प्रिमियर लिग टि–२० या (ईपीएल) प्यंगूगु संस्करणय् म्हितीगु जूगु दु । अफ्रिदी काठमाडौं किङ्स इलेभेन पाखें ईपीएलय् ब्वति कायेत्यंगु खः । टेले होल्डिङ्स प्रा.लि.या स्वामित्वय् दुगु काठमाडौं किङ्स इलेभेनं सोमवाः छगू ज्याझ्वः यासें अफ्रिदीयात आइकोनिक प्लेयर कथं हयागु जानकारी बिउगु खः ।

पाकिस्तानया पूर्व कप्तान ४४ दँयाम्ह अफ्रिदीं पाकिस्तानया निंतिं २७ टेस्ट, ३९७ एक दिवसीय व ९९ टि–२० म्हितूगु दुसा स्वंगुलिं फम्र्याटय् यानाः अफ्रिदीं ११,२१६ रन दयेकेधुंकूगु दु, अथेहे ५४१ विकेट नं काःगु दु । अफ्रिदीं पाकिस्तानया निंतिं सन् १९९६ निसें २०१८ तक म्हितूगु खः ।

अफ्रिदीं नेपालय् म्हितेखंगुलिं लय्ताया धाःगु दु । ज्याझ्वलय् भिडियो कन्फरेन्सपाखें लाइभय् वःम्ह अफ्रिदीं धाःगु दु ‘ इमान्दारीपूर्वक धायेगु खःसा जिं नेपाःया क्रिकेट बारे मसिउ, तर जिं सिउ मनूतय्त क्रिकेट यः ।’ एभरेष्ट प्रिमियर लिग टि–२० असोज ९ गते निसें २३ गते तक जुइ । लिगय् काठमाडौंलिसें खुगू टिमं ब्वति काइ ।