उपेन्द्र यादवया धापू न्यनाः एमाले जिल्ल

येँ (नेपालभाषा टाइम्स)÷चुनाव लिपा एमालेलिसे जूगु गठबन्धन भंग जुल धइगु जसपा अध्यक्ष उपेन्द्र यादवया धापू न्यनाः नेकपा (एमाले) जिल्ल जूगु दु । यादवया थ्व धापुतिं थः समेत दुगु सरकार गठन यायेगु तयारी यानाच्वंम्ह एमालेयात तःधंगु धक्का लाइगु सम्भावना ब्वलंगु दु । उलि जक मखु, थुकिं यानाः मधेस प्रदेशय् तःधंगु दलया हैसियतं सरकार गठन यायेगु एमालेया मौका समेत गुमे जुइगु सम्भावना पिदंगु दु ।

यादवया थ्व धापू पिहां वयेवं एमालेया नेतातय्सं वय्कःयात ‘अवसरवादी’ धकाः ब्वः बियाहःगु दु । सूत्रं धाः कथं यादवं न्ववाःगु थ्व धापू बारे स्वयम् जसपाया नं आपालं नेतात अनभिज्ञ जुयाच्वंगु दनि । थ्व बारे पार्टी दुने छुं सल्लाह मजूनिगु खँ धाःगु दु । मेखे एमालें सरकार गठनया सम्भावना मालेत म्हिगः पार्टी सचिव रघुवीर महासेठयात माओवादी अध्यक्ष पुष्पकमल दाहाललिसे खँ ल्हाके छ्वःगु दु ।