सर्वोच्चया आदेश अःखः सतक विस्तार

सतक विस्तारया निंतिं वंगु एक्स्काभेटरय् आक्रमण

यल – गोदावरीइ सतक विस्तार यायेत वःगु एक्स्काभेटरया चालकयात स्थानीय वासिन्दां दाःगु दु । सतक विस्तार पीडित संघर्ष समितिया नामं वःगु पुचलं चालक सन्तोष कोइरालाया दाःगु खः ।

गोदावरी सतक विस्तार विरुद्ध स्थानीय जनतां सर्वोच्च अदालतय् मुद्दा तयातःगु खःसा उगु मुद्दा विचाराधीन जुयाच्वंगु इलय् सतक विस्तार यायेत एक्स्काभेटर हयेवं स्थानीय जनता आक्रोशित जुयाः तोडफोड याःगु खँ सतक विस्तार पीडित संघर्ष समितिया अध्यक्ष सुमन साय्मि ‘नेपालभाषा टाइम्स’ यात कनादीगु दु ।

वय्कःया कथं सर्वोच्च अदालतंया फुल बेन्चं सरकारयात निर्देशनात्मक आदेश बियाः सतक विस्तार यायेगु झ्वलय् स्थानीय वासिन्दाया सहमति मदयेकं विस्तार यायेगु ज्या याये दइ मखु धकाः धयातःसां नं सरकारं बलजफ्ति सतक विस्तार यायेगु ज्या यानाच्वंगु दु ।

उकथं हे उगु निर्देशनात्मक आदेशय् स्थानीय जनताया बसोबासया ग्यारेन्टी जुइमाःगु, उमिगु व्यवसाय लिसे मस्तय्गु ब्वनेगु व्यवस्था जुइमाःगु आदी यानाः खुगू बुँदाया आदेश सर्वोच्च अदालतं सरकारयात बिउगु खः । तर सरकारं अदालतया आदेशयात नं अवहेलना यायेगु ज्या यानाच्वंगु द्वपं भाजु साय्मि बियादीगु दु ।

सतक विस्तार यायेगु झ्वलय् सार्वजनिक जग्गाय् जक डोजर लगे यायेगु धकाः वःगु खःसां नं सरकारं मचायेक जनताया छेँ नं थुनेगु यानाच्वंगु द्वपं बियादिसें साय्मिं सरकारं जनतायात झंगः लानाच्वंगु खँ कनादीगु दु । सतक विस्तार यायेत वःगु डोजरय् आक्रमण यायेधुंकाः स्थानीय जनतां म्हिगः अनया वडा ज्याकुथिं नं आक्रमण याःगु दु । स्थानीय वासिन्दा वडाया ज्याकू तोडफोड यायेगुया लिसें वडाय् तालं ग्वया बिउगु दु ।

मीन भवनय् नं छेँ थुनेगु कुतः

जनताया छेँय् थुनेगु निंतिं जनप्रतिनिधि हे न्ह्यःने वःगु दु । येँया मीन भवनय् गारेटो लँ जक दुगु थःगु जग्गाय् लँ यंकेगु निंतिं प्रदेशसभाया सांसद लिसें स्थानीय वडाया हे वडा दुजः तकं न्ह्यःने वःगु खँ सीदुगु दु । गोरेटो लँयात १६ फिट यायेगु निंतिं प्रदेशया सांसद गणेश दुलाल व ३१ वडाया वडा सदस्य रमेश सत्याल जूगु खँ सूत्रं धाःगु दु ।

उगु विस्तार यायेमाल धाःसा अन म्होतिं नं झिंच्याखा छेँ निसें नीखा छेँ थुनेमालीगु जानकारी नं सूत्रं बिउगु दु । छखे स्थानीय जनता सतक विस्तार विरुद्ध प्रदर्शन यानाच्वंगु दुसा मेखे जनप्रतिनिधिपिंसं हे थःगु जग्गाय् तक लँ तब्याः यायेगु निंतिं स्थानीय जनताया छेँय् थुनेत न्ह्याः वयाच्वंगुलिं जनताया दथुइ न्ह्यसः चिं ब्वलनाच्वंगु दु ।

सांगाय् नं सरकार विरुद्ध मुद्दा
भ्वँतया सांगय् नं मापदण्ड हे मदुगु थासय् नं सतक विस्तार यायेगु ज्या सरकारं न्ह्याकूगुलिं उकिया विरोधय् स्थानीय जनतां म्हिगः सर्वोच्च अदालतय् मुद्दा दायर याःगु दु । सतक विस्तार पीडित संघर्ष समितिया न्ह्यलुवाय् मुद्दा दर्ता यायेगु ज्या जूगु खँ सतक विस्तार पीडित संघर्ष समितिया अध्यक्ष सुमन साय्मि जानकारी बियादीगु दु । पीडित स्थानीय झिम्ह व्यक्तितय्सं मंकाः कथं म्हिगः मुद्दा दायर याःगु खँ नं भाजु साय्मि जानकारी बियादीगु दु ।