सुकुम्बासी चीकेत गृहया ग्वाहालि फ्वन

येँ (नेपालभाषा टाइम्स)- येँ महानगरपालिकां थापाथलीइ च्वंगु सुकुम्बासी वस्ती चीकेत गृह मन्त्रालययाके ग्वाहालि फ्वंगु दु । मनपाययात येँया सीडीओपाखें ग्वाहालि मयायेवं मनपां गृह मन्त्रालययात पौ च्वयाः बस्ती चीकेगु ज्याय् समन्वय यायेत इनाप याःगु खः ।

थ्व स्वयां न्ह्यः बामगति सभ्यता एकीकृत विकास परियोजनाया इनापय् येँमनपां बस्ती चीकेत स्वःगु खः । तर अन च्वंपिं सुकुम्बासीतय्सं मनपाया प्रहरीतय्त हे आक्रमण यायेवं वस्ती चीकेगु ज्या स्थगित जूवंगु खः । उगु इलय् मनपायात नेपाल प्रहरीं नं ग्वाहालि मयाःगु खः ।

येँ महानगरया प्रमुख प्रशासकीय अधिकृत बसन्त अधिकारीं गृह मन्त्रालययात च्वःगु पतिइ धयातःगु द, ‘खुसि सिथय् च्वंगु संरचना चीकेत तःक्वः यानाः नं पंगः थंगुलिं सफल मजुल, मन्त्रालयपाखें जिप्रका व सुरक्षा निकाययात माःगु निर्देशन लिसें समन्वय याना बीत इनाप याना ।’ मनपाया पतिइ सुकुम्बासी खँग्वः मछ्यसे ‘अनधिकृत संरचना’ च्वयातःगु दु ।

थ्वहे झ्वलय् येँ मनपाया पुलांम्ह मेयर विद्या सुन्दर शाक्यं येँय् च्वनाच्वंपिं सुकुम्बासी समस्या धइगु महानगरपालिका जक मखु राज्यया हे समस्या जूगुलिं थुकी राज्यं हस्तक्षेप मयायेक मनपां जक समाधान याये फइ मखु धयादीगु दु । छगू टिभी अन्तर्वार्ताय् न्ववासें वय्कलं सुकुम्बासी समस्या चीकेगु मनपाया अधिकार क्षेत्रय् मलाःगु जुयाः राज्यं हे थुकी ल्हाः तयेमाः धयादिल ।