वाईएमबीएय् परियत्ति उत्तीर्ण जूपिंत दसिपौ

यल – युवक बौद्ध मण्डल नेपालया गोल्डेन क्लबपाखें संचालन जूगु परियत्ति शिक्षाय् उत्तीर्ण जूपिं विद्यार्थीतय्त छगू ज्याझ्वःया दथुइ दसिपौ व सिरपाः लःल्हाःगु दु । मूपाहांकथं बिज्याःम्ह नेपाल परियत्ति शिक्षा परिषद्या केन्द्रीय परीक्षा नियन्त्रक भिक्षु बोधिज्ञान महास्थवीरं दसिपौ व सिरपाः लःल्हनाबिज्याःगु खः ।

क्लबपाखें संचालन जुयाच्वंगु वाई.एम.बी.ए परियत्ति केन्द्रपाखें २०७४ सालया परियत्ति कक्षा १, २ व ३ या परीक्षाय् उत्तीर्ण जूपिंत मूपाहांपाखें दसिपौ व सिरपाः लःल्हाःगु खः । युवक बौद्ध मण्डलया अध्यक्ष मय्जु अरणीतारा वज्राचार्यया सभापतित्वय् जूगु खः ।

केन्द्रया संचालक हिरारत्न शाक्यं लसकुस यानादीगु ज्याझ्वलय् आशारत्न गम्भीर, बाबुरत्न नापित व तेजमुनि वज्राचार्यंपिंसं परियत्ति शिक्षाया थीथी पक्षयात कयाः नुगःखँ तयादीगु खः। केन्द्रं बिउगु जानकारीकथं ५२ म्हेसिन परीक्षा बिउगुलिइ ४२ म्ह उत्तीर्ण जूगु खः ।