पाराग्लाइडिङ्गय् स्वंगू अवार्ड
पल्सर स्पोर्टस् अवार्ड
येँ – वंगु एशियाली कासाय् पाराग्लाइडिङ्ग पाखें नेपाःयात रजत पदक त्याकेत मू भूमिका म्हितूम्ह युकेश गुरुङ्ग पल्सर स्पोर्ट अवार्ड २०७५ या उत्कृष्ट मिजं कासामि जूगु दु । टिम इभेन्टय् रजत पदक त्याकूगु थुगु टिम अवार्डय् उत्कृष्ट टिम नं जूगु दुसा थुकिया हे प्रशिक्षक योगेश भट्टराई उत्कृष्ट प्रशिक्षक जूगु दु ।
मंगलवाः नेपाल प्रज्ञा प्रतिष्ठानय् जूगु छगू ज्याझ्वलय् उत्कृष्ट कासामिपिंत अवार्ड लःल्हाःगु खः । एशियाली कासाय् रजत त्याकूगु नेपाःया पाराग्लाइडिङ्ग टिम उबलय् २.७ अंकं जक स्वर्ण पदकं लिउने लाःगु खः । म्हिगः जूगु अवार्डय् राष्ट्रिय फुटबल टिमया सावित्रा भण्डारी उत्कृष्ट मिसा कासामि जुलसा पिपल्स च्वाइस अवार्ड भलिबलया रश्मि भण्डारीं त्याकेत ताःलात ।
एसएमएस भोटिङ्गया आधारय् जूगु पिपल्स च्वाइस अवार्डय् भण्डारीं ३४ प्रतिशत मत कायेत ताःलाःगु खः । तर थुगु विधाय् नोमिनेशनय् लाःम्ह विश्वय् हे नांजाःम्ह क्रिकेट कासामि सन्दीप लामिछानें धाःसा ५ प्रतिशत मत कायेत नं असफल जुल ।
नेपाल खेलकूद पत्रकार मञ्चय् दँय्दसं बिया वयाच्वंगु थ्व अवार्डया झिंखुक्वःगु संस्करणय् एथलेटिक्सया भेट्रान कासामि हरिबहादुर रोकायायात लाइभटाइम एचिभमेन्टं सम्मान याःगु खः । रोकाया स्वक्वः तक एभरेष्ट म्याराथुन त्याकेगु लिसें थ्व म्याराथुनय् विश्व रेकर्ड तयातःम्ह कासामि खः ।
एभरेस्ट म्याराथुनय् रोकायां तयातःगु रेकर्ड आःतक सुनां नं त्वाथले मफुनि । एथलेटिक्सया हे अजित कुमार यादवं उत्कृष्ट ल्याय्म्ह कासामिया अवार्ड ल्हातय् लाकल । यादवं छुं ई न्ह्यव हंगकंगय् जूगु एथलेटिक्सय् स्वर्ण पदक त्याकूगु खः ।
थौंकन्हय् इन्डोनेशियाय् क्लब फुटबल म्हिताच्वंम्ह रोहित चन्दयात विशेष अवार्ड बिउगु खःसा पारा एथलेटिक्सपाखे ब्लाइन्ड क्रिकेट कासामि मनकेशी चौधरीयात अवार्ड लःल्हाःगु खः । ज्याझ्वलय् पाकिस्तान खेलकूद पत्रकार अमजद अजिज मल्लिकयात एसियन स्पोर्टस् जर्नलिस्ट अवार्ड नं लःल्हाःगु खः ।
LEAVE YOUR COMMENTS