वडापाखें फिजियोथेरापी केन्द्र संचालन

यल(नेपालभाषा टाइम्स)- यल महानगरपालिका वडा नं १६ पाखें फिजियोथेरापी केन्द्र संचालनय् हःगु दु । वडायात स्वास्थ्यया ख्यलय् हे नमूना वडा दयेकेगु ल्याखं इलाननिइ रचना फिजियोथेरापी उपचार केन्द्र संचालनय् हःगु खः ।

१६ वडाअध्यक्ष निर्मलरत्न शाक्यं वडा समितिपाखें रचना आयुर्वेद तथा अर्थो न्यूरो रिहाबिलिटेशन व ईलाननी टोल सुधार समितिया समन्वय व मंकाः ग्वसालय् संचालनय् हःगु केन्द्रया वंगु शनिवाः उलेज्या यानादीगु खः ।

केन्द्रया उलेज्या यानादिसें वडाअध्यक्ष शाक्यं थनिं स्वदँ न्ह्यः हे फिजियोथेरापी केन्द्र संचालनय् हयेगु योजना दयेकागु जानकारी बियादिल । वय्कलं उगु इलय् स्वास्थ्य शिविर संचालन यानागु इलय् हे फिजियोथेरापी केन्द्र संचालन यायेगु योजना दयेकागु जानकारी बियादीगु खः । केन्द्रया संचालनलिपा समुदायस्तरय् स्वास्थ्य सेवाय् सहज रुपं पहुँच दइगु विश्वास यानादिल ।

रिहाबिलेशन सेन्टरया डा. चन्द्रदीप महतों केन्द्रय् क्वें ज्यला वंगु, नशा कानाच्वंगु, म्हुतु बेक्वःगु, जोर्नी स्याइगु, पक्षाघात (पारालाइसिस) जूपिं, ल्हाःतुति वाइँया मिनिगुनापं फरक क्षमता (सुस्त मनस्थिति)या मस्तय्त सहुलियत दरय् उपचार सेवा बीगु जानकारी बियादिल ।

वडाया २० गू लख बजेटं स्थानीय टोल सुधार समितिया भवनय् संचालनय् हःगु केन्द्रय् आःयात ४ गू श्यया दुसा लिपा उकियात विस्तार याना यंकेगु ग्वसाः दुगु वडा समितिं जानकारी बिउगु दु ।

उगु इलय् समितिया अध्यक्ष राज बज्राचार्य, वडा सदस्य बबिता श्रेष्ठ, वडा समितिया सल्लाहकार धर्मेन्द्र शाक्यपिंसं नं नुगःखँ तयादीगु खः ।

सम्बन्धित बुखँ

LEAVE YOUR COMMENTS