यलय् उद्घोषण तालिम क्वचाल
यल – यल महानगरपालिका वडा नं. ८या थीथी मिसा पुचःया निंतिं जूगु उद्घोषण व वत्तृmत्वकला विकास तालिम क्वचाःगु दु । जय मनोहर महाविहार मिसा पुचः सुबहाःया ग्वसालय् यल मनपा वडा नं. ८ या ग्वाहालिइ झिन्हुयंकं उगु तालिम जूगु खः ।ग्वसाः खलःलिसें यंगुबहाः मिसा पुचः, सरस्वति मां पुचः, सुबहाः मां पुचः, जागृति महिला समूहया मय्जुलिसें भाजुपिं यानाः नीन्याम्हेसिनं उगु तालिम कयादीगु खः ।
जय मनोहर महाविहार मिसा पुचःया नायः पंचमाया शाक्यया सभापतित्वय् जूगु तालिम समापान ज्याझ्वःया मूपाहां यल मनपा वडा नं. ८ या वडाअध्यक्ष हेम महर्जनं प्रशिक्षार्थीतय्त दसिपौ लःल्हानादीगु खः । ज्याझ्वलय् नवासें मूपाहां महर्जनं थुकथंया क्षमता विकास जइगु तालिम वा मेमेगु ज्याझ्वःया निंतिं ग्वाहालि यायेत न्ह्याबलें तयार दुगु खँ धयादिल ।
तालिम समापन ज्याझ्वलय् विशेष पाहां मिसा वडा सदस्य लक्ष्मी महर्जन, प्रशिक्षक सुरजवीर वज्राचार्य, जय मनोहर महाविहारया दाफा भजन गुरु नेमराज शाक्य लगायतं नुगःखँ तयादीगु खः । ज्याझ्वलय् प्रशिक्षार्थी अनुषा शाक्यं लसकुस यानादीगु खःसा मेम्ह प्रशिक्षार्थी सुनीता शाक्यं सुभाय् देछानादीगु खः ।
प्रशिक्षार्थीपिं ज्ञानीशोभा शाक्य, बालकुमारी शाक्य, रमिला बज्राचार्य, शान्ता शाक्य, अष्टरत्न शाक्य, सुमन शाक्य, पूनम महर्जन, अञ्जना शाक्य, लक्ष्मी शाक्यं तालिमया थीथी अनुभव कनादीगु ज्याझ्वलय् विहारया थपाआजु पुण्यराज शाक्य, वडा सदस्य प्रकाश महर्जन, विहार सुधार समितिया नायः सिंगराज शाक्यपिनिगु उपस्थिति दुगु खः ।
LEAVE YOUR COMMENTS