चुनावय् ल्वापुख्यापुया घटना म्हो

येँ (नेपालभाषा टाइम्स)- निर्वाचन आयोगया आयुक्त रामप्रसाद भण्डारीं निर्वाचन आयोगं आचार संहिता कडाइ याःगु कारणं कानून उल्लंघनया घटना म्हो जूगु खँ धयादीगु दु । वय्कलं आयोग न्हापा सुधारात्मक मोडलय् जूसां नं आः दण्डात्मक रुपय् न्ह्यःने वयागु खँ नं धयादीगु दु ।

वय्कलं आयोगयात उत्तेजित जूगु द्वपं लाःगु धासें आचार संहिता पालना याकेगु सन्दर्भय् आयोग संयमित दुगु खँ नं धयादीगु दु । उकथं हे आयुक्त भण्डारीं अप्वः आचार संहिता उल्लंघन जुइगु ई प्रचार प्रसारया ई जूगुलिं प्रचार प्रसारया ई म्हो यानागु कारणं यानाः अप्रिय घटना मजूगु दावी नं यानादीगु दु ।

आयुक्त भण्डारीं आचार संहिता उल्लंघनया १४९ गू उजुरी निर्वाचन आयोगय् लाःगु जानकारी बिसें उकी ध्ये ११६ म्हेसित स्पष्टीकरण न्यनागु खँ धयादीगु दु । उकी मध्ये गुंगू मुद्दाय् धाःसा आचार संहिता उल्लंघन जूगु निर्णय आयोगं यायेधुनागु खँ नं कनादीगु दु ।

अथे हे वय्कलं ३५ गू मिसिलया सन्दर्भय् छन्हु निन्हुया दुने हे निर्णय यायेगु व मेगु क्रमशः निर्णय जुइगु खँ नं स्पष्ट यानादीगु दु । वय्कलं निर्वाचन आयोगं मतदान न्ह्यः हे आचार संहिता उल्लंघनया फुक्कं उजुरी बारे निर्णय यायेगु ज्या क्वचायेकेगु खँ नं धयादीगु दु ।

उकथं हे निर्वाचन आयुक्त ईश्वरीप्रसाद पौड्यालं गृह व रक्षा मन्त्रालयं संवेदनशील व अतिसंवेदनशील थाय् म्हसीकेमाःगु खँ धयादीगु दु । वंगु निर्वाचनया झ्वलय् जूगु हुलदंगायात जक आधार दयेकाः संवेदनशील व अतिसंवेदनशीलया परिभाषा यायेगु उचित जुइ मखु धासें वय्कलं मौन अवधिया इलय् उम्मेदवारतय्सं ध्यबा इनेगु यानाच्वंगु धासें उकियात पनेगु नितिं ध्यान बीमाःगु खँ नं धयादीगु दु । उकथं हे वय्कलं ध्यबा इनेगु ज्या पनेगु नितिं ¥यापिड टिम दयेकाः ज्या यायेमाःगु खँ नं धयादीगु दु ।

निर्वाचन आयोगय् बिरामी जूगु नाटक यानाः चुनावय् हेलिकप्टर छ्यःगु निगू उजुरी लाःगु दु । प्रमुख निर्वाचन आयुक्त दिनेशकुमार थपलियां हेलिकप्टर छ्यःगु विषयसं निगू उजुरी लाःगु खँ कनादीगु खः । म्हिगः आयोगय् जूगु निर्वाचन आचार संहिता कार्यान्वयन सम्बन्धी एकीकृत कार्ययोजना, २०७९ विषयसं सहलहया झ्वलय् वय्कलं निगू उजुरी लाःगु जानकारी बियादीगु खः ।

सम्बन्धित बुखँ

LEAVE YOUR COMMENTS