ने. सं. ११४३ चौलाथ्व पारू -

कांग्रेस व जसपाया लिसः मवयाः नेकपाय् अन्यौल

येँ – प्रमुख प्रतिपक्षी दलया रुपय् दुगु नेपाली कांग्रेस व जनता समाजवादी पार्टीं सत्ता समीकरण बारे आः तक छुं हे निर्णय मयाःनिगु कारणं नेकपाया ओली पक्ष व दाहाल–नेपाल पक्ष निगुलिंयात न्ह्यःने न्ह्याः वनेत समस्या जुयाच्वंगु दु । कांग्रेस व जसपां छु निर्णय याइ धकाः नेकपाया निगुलिं गुट पियाच्वंगु दु ।

तर कांग्रेस व जसपा निगुलिं पार्टी धाःसा नेकपा आः तक औपचारिक रुपं विभाजित हे मजूनिगु कारणं छुं निर्णय याये फइगु अवस्थाय् लानाच्वंगु मदुनि । सूत्रतय्सं धाः कथं कांग्रेस दुने छगू हे कम्युनिष्ट पार्टीया छम्ह कम्युनिष्ट नेताया पलेसा मेम्ह कम्युनिष्ट नेतायात प्रधानमन्त्री दयेकेगु लागिं थःपिंसं छाय् कुतः यायेगु धइगु मत तःधं जुया वयाच्वंगु दु । छम्ह कम्युनिष्टयात लिकयाः मेम्ह कम्युनिष्टयात हयेगु जक खःसा उकी थःपिंसं छुं हे योगदान मयायेगु धइगु मनस्थितिइ कांग्रेस थ्यंगु खँ सूत्रं धाःगु दु ।

कांग्रेस दुने थज्याःगु अभिमत ब्वलंगुया अर्थ यदि कांग्रेसयात हे प्रधानमन्त्री बीगु धइगु स्पष्ट प्रस्ताव मवःतले सुम्क च्वनेगु खः धइगु अर्थय् थुइका हःगु दु ।

उखे जसपा दुने नं थःपिंसं ल्ह्वना वयाच्वनागु संविधान संशोधनया मागयात सम्बोधन मयाइगु खःसा ओलीयात चीकाः दाहाल–नेपाल पुचःयाम्ह प्रधानमन्त्री वःसां थःपिंत छुं लबः दइ मखु धइगु विश्लेषणं थाय् कया हःगु दु । गुगु पुचलं थःपिनि मागयात सम्बोधन याइ वयात हे जक समर्थन याये फइ धइगु बिचाः उगु पार्टी दुने ब्वलनाच्वंगु दु ।

दाहाल–नेपाल पुचःया नेतात थौंकन्हय् थःपिनि ज्याकुथी ब्वाँय् वयाच्वंसां संविधान जारी याःगु इलय् ला थुमिसं नं थःपिंत धोका हे बिउगु खः धइगु बिचाः नं जसपा दुने कडा रुपं दना वयाच्वंगु खँ नं धाःगु दु । थुपिं कारणं यानाः संसद पुनस्र्थापना लिपा कांग्रेस व जसपां थःपिंत गुलि अःपुक समर्थन याइ धकाः दाहाल–नेपाल पुचलं आशा याःगु खः व आः पूवनीगु सम्भावना खने मदयावंगु सूत्रया दावी दु ।

मेखे निर्वाचन आयोगं नं आः तक छुं फैसला मबिउगुलिं दाहाल–नेपाल पुचःयात न्ह्यःने वनेत सकस जुयाच्वंगु खँ धाःगु दु । थ्व पुचलं निर्वाचन आयोगया फैसला थःपिनि पक्षय् वइगु जुल धकाः सार्वजनिक रुपं दावी यानाच्वंसां सर्वोच्च अदालतय् ‘नेपाल कम्युनिष्ट पार्टी’ नांयात कयाः लानाच्वंगु मुद्दाय् गज्याःगु फैसला वइ धइगु चिउताः नं ब्वलनाच्वंगु दु ।