‘नो नट अगेन’ यात ख्याच्वः

येँ (नेपालभाषा टाइम्स)- पुलांपिं नेतातय्त चुनावय् बुकेमाः धकाः थन शुरु यानाच्वंगु ‘नो नट अगेन’ अभियान न्ह्याकेगु झ्वलय् सुं नं उम्मेदवारयात लक्षित यानाः चरित्र हत्या यायेगु, गलत सुचं पित बीगु, अपमान जुइगु खँग्वःत छ्यलाः न्ववायेगु ज्या याये मजिउगु खँ निर्वाचन आयोगं धाःगु दु ।
प्रमुख निर्वाचन आयुक्त दिनेश कुमार थपलियां निर्वाचनया स्वच्छता कायम याना तयेगु लागिं नं थःपिंसं थुकी ध्यान बियाच्वनागु धासें उकथंया दुष्प्रचार मयायेत नं सचेत यानादीगु दु ।

म्हिगः कलाकारतलिसे निर्वाचन आयोगं याःगु अन्तक्र्रियात्मक ज्याझ्वः– यात सम्बोधन यासें प्रमुख आयुक्त थपलियां थ्व खँ कनादीगु खः ।
निर्वाचन आयोगं उगु अभियान न्ह्याके दइ मखु धकाः पनेत समेत निर्देशन बिउगु खःसा अभियान न्ह्याकाच्वंपिंंसं सर्वोच्चय् रिट तयाः पने म्वाःलीगु अन्तरिम आदेश जारी याकूगु खः ।

थ्व अभियान न्ह्याकाच्वंगु पुचलं सामाजिक सञ्जालय् पुलांपिं नेतात खास यानाः शेरबहादुर देउवा, केपी ओली, पुष्पकमल दाहाल, रामचन्द्र पौडेल आदिपिंत लक्षित यानातःगु दुसा थ्व नेतातय्त बुकेत सम्बन्धित क्षेत्रय् उम्मेदवारत नं थनातःगु दु ।

कलाकारतलिसे अन्तक्र्रिया यासें प्रमुख आयुक्त थपलियां लोकतन्त्रया आडय् सुयां नं चरित्र हत्या यायेगु खँ स्वीकार्य मजुइगु व घृणास्पद अभिव्यक्ति प्रति आयोग गम्भीर जुइगु खँ नं धयादीगु खः ।

उकथं हे वय्कलं ‘नो नट अगेन’, ‘नो नेभर अगेन’, ‘इलेक्ट एण्ड अगेन’, ‘इलेक्ट अगेन एण्ड अगेन’ थेंज्याःगु शब्दयात आयोगं मपंगु तर थज्याःगु खँ धायेबलय् सभ्य भाय् छ्यलेमाःगु खँय् नं सचेत यानादिल । लोकतन्त्र, निर्वाचन व अभिव्यक्ति स्वतन्त्रता लिसें चरित्र हत्या यायेगु खँ, मिथ्या सुचं बीगु खँ, दुष्प्रचार यायेगु खँ व घृणास्पद अभिव्यक्ति बी मजिउगु खँ नं धयादीगु दु ।

वय्कलं निर्वाचन थें बांलाःगु थासय् खिउँगु क्वथाय् च्वनाः सुना नं दुष्प्रचार यानाच्वन धाःसा आयोगं उकिया अध्ययन व अनुसन्धान यानाः कारबाही यायेगु ख्याच्वः नं बियादिल ।

उकथं हे प्रमुख आयुक्त थपलियां लिपांगु इलय् निर्वाचन आयोगं आचार संहिता कडाइ याःगुलिं निर्वाचनया वातावरण ब्वमलन धइगु द्वपं फयेमालाच्वंगु धासें आवंनिसें निर्वाचनया माहोल दयेकेगु खँय् निर्वाचन आयोग प्रतिबद्ध जूगु खँ नं धयादिल । वय्कलं निर्वाचनयात निष्पक्ष, स्वतन्त्र व भयरहित रुपय् यायेत कलाकारपिनिगु भूमिका महत्वपूर्ण जुइ धासें कलाकारतय्त निर्वाचन सम्बन्धी सुचं प्रचार प्रसार यायेत नं इनाप याना–दीगु दु ।