देउवायात ‘डिबेट’ य् वयेत ओलीया हाथ्या

येँ (नेपालभाषा टाइम्स)- प्रमुख प्रतिपक्षी नेकपा एमालेया अध्यक्ष केपी शर्मा ओलीं प्रधानमन्त्री लिसें नेपाली कांग्रेसया सभापति शेरबहादुर देउवायात चुनाव केन्द्रित बहसय् वयेत हाथ्या बियादीगु दु । अध्यक्ष ओलीं म्हिगः सामाजिक सञ्जाल फेसबुकपाखें यक्वस्यां प्रधानमन्त्री देउवालिसे लाइभ डिबेटय् वा धयाच्वंगु दु धासें उकिया नितिं थः तयार दु, देउवा तयार दु कि मदु धकाः न्ह्यसः नं न्यनादीगु दु ।

ओलीं सामाजिक सञ्जालय् च्वसें विदेशय् चुनावया न्ह्यः थज्याःगु डिबेट जुइगु चलन दु धासें थन अनं अज्याःगु डिबेट यायेमाःगु बिचाः प्वंकादीगु दु ।

मेखे नेकपा एमालेपाखें विद्रोह यानाः रुपन्देही क्षेत्र नं. १ य् उम्मेदवारी बियादीम्ह घनश्याम भुसालं धाःसा एमाले अध्यक्ष ओलीयात नेपाःया राजनीति दुर्गन्धित याःम्ह धकाः द्वपं बियादीगु दु । सत्तारुढ गठबन्धनया समर्थनय् उम्मेदवार जूम्ह भुसालं म्हिगः गठबन्धनया सम्पर्क ज्याकू उलेज्या यासें उगु खँ धयादीगु खः ।

संसद व संविधानया रक्षाया नितिं थम्हं न्ह्याबलें पार्टी दुने संघर्ष यानागु खँ धासें भुसालं अध्यक्ष ओलीं अराजनीतिक गतिविधि मयाःगु खःसा देय्या राजनीति आः मेगु हे अवस्थाय् थ्यनीगु दावी नं यानादीगु दु ।

ओलीं पार्टी दुने व्यक्तिवाद क्वचिनेगु व पिने अराजनीतिक गतिविधि याःगु कारणं यानाः पार्टी विभाजन जूगु खः धासें धयादिल, ‘संविधान दयेकेधुंकाः देय् विकास व समृद्धिया दिशाय् न्ह्यःने न्ह्याः वनेत्यंगु इलय् ओलीं नेपाःया राजनीति बुलुकेगु ज्या याःगु दु ।’