खनालयात बधाई बिसें खरेलया राजीनामा

येँ – नेपाल प्रहरीया आईजी पदय् सर्वेन्द्र खनाल नियुक्त जुइवं वहे पदया लागिं आकांक्षी जुयाच्वंम्ह मेम्ह डीआईजी रमेश खरेलं राजीनामा बियादीगु दु । वय्कलं म्हिगः फेसबुक मार्फत न्हूम्ह प्रमुख खनालयात भिंतुना बिसें थः चाहिं २९ दँ ताःहाकःगु प्रहरी सेवापाखें अलग्ग च्वनागु घोषणा यानादीगु खः ।

थुगुसी प्रहरी प्रमुख जुइगु लागिं खनाल व खरेल लगायत पुष्कर कार्की दथुइ धेंधेंबल्लाः जूगु खः । प्रधानमन्त्री केपी ओली रमेश खरेलयात हे प्रहरी प्रमुख दयेकेगु पक्षय् दुगु खःसां माओवादी केन्द्रया अध्यक्ष पुष्पकमल दाहाल लिसें गृहमन्त्री रामबहादुर थापा बादल धाःसा सर्वेन्द्र खनालया पक्षय् वंगु व उकिया लागिं वय्कःपिंसं कडा दबाब बिउगुलिं खनाल हे नियुक्त जुल ।

उखे राष्ट्रपति विद्यादेवी भण्डारीं स्वंगूगु नम्बरय् लानाच्वंम्ह पुष्कर कार्कीयात प्रहरी प्रमुख दयेकि धकाः शितल निवासं हे लबिङ यानादीगु खँ नं सीदुगु दु । थुकिया लागिं राष्ट्रपति भण्डारीं प्रधानमन्त्रीयात नं दबाब बियादीगु खँ सूत्रं धाःगु दु । कार्की राष्ट्रपति भण्डारीया तापाकं थः नं लाःम्ह खः ।

तर प्रमयात सरोकारवाला मन्त्रालयया मन्त्री व सत्ता साझेदार दलया नेतां हे दबाब बिउगुलिं छुं याये मफुत । न्हूम्ह प्रहरी प्रमुख खनालं निगूगु नम्बरय् लाःम्ह खरेलयात राजीनामा बी मते, मिले जुयाः ज्या याये धकाः प्रस्ताव समेत तयादीगु खँ नं सीदुगु दु । तर खरेलं उकियात स्वीकार धाःसा याना मदी । स्वंगूगु नम्बरय् लाःम्ह कार्कीं धाःसा मिले जुयाः ज्या याये धयादीगु दु ।