येँय् ४म्ह स्वास्थ्यकर्मीतय्त कोरोना, संक्रमितत २ हजारं अप्वल

येँ  – येँया काठमाडौं मेडिकल कलेजय् ज्या याइपिं ४म्ह स्वास्थ्यकर्मीत नापं देय्न्यंक २ सय ८८म्ह मनूतय्त कोरोनाया संक्रमण जूगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं येँ ४म्ह स्वास्थ्यकर्मी, ख्वपय् १म्ह मिसा नापं देय्न्यंक २ सय ८८म्हेसित संक्रमण जूगु पुष्टि यानादीगु दु ।

येँया राष्ट्रिय जनस्वास्थ्य प्रयोगशालाय् याःगु परीक्षणय् येँया मेडिकल कलेजया ३म्ह मिसा स्वास्थ्यकर्मी व १म्ह मिसं स्वास्थ्यकर्मीतय्त संक्रमण जूगु खः । अथे संक्रमण जूपिं स्वास्थ्यकर्मी २४ निसें ३२दँयापिं खः । अथेहे ख्वपया चाँगुनारायणय् च्वम्ह ३०दँया मिसयात नं संक्रमण जूगु दु ।

जनस्वास्थ्य प्रयोगशालाय् याःगु परीक्षणय् येँ व ख्वप सहित यानाः १ सय १८म्हेसित संक्रमण खनेदुगु खः । येँ जूगु परीक्षणय् धनुषया ६म्ह, महोत्तरीया २म्ह, रौतहटया ३६म्ह, सर्लाहीया २१म्ह, सिरहाया १७म्ह, धाडिङया १म्ह, कपिलवस्तुया १६म्ह, नवलपरासी पूर्वया १म्ह, नवलपरासी पश्चिमया १म्ह, नुवाकोटया निम्ह व रुपन्देहीया १०म्हेसित संक्रमण जूगु पुष्टि जूगु खः ।

अथेहे धुलिखेल, पोखरा, धरान, भेरी, सुर्खेत, हेटौंडा, राप्ती लगायत प्रयोगशालाय् याःगु परीक्षणय् १ सय ७०म्हेसित संक्रमण खनेदुगु खः ।नेपालय् कोरोनाया संक्रमण जूपिनि ल्याः २ हजार ९९म्ह थ्यंगु दुसा ६१गू जिल्लाय् संक्रमण थ्यंगु दु ।

सम्बन्धित बुखँ

LEAVE YOUR COMMENTS